Ka chaad niam Behdieñkhlam yong ka Seiñraij Ialong kawa kynthup ya ka Raij Ialong, Raij Wahiajer wa Raij Nongkyllep dapoi ko chawa kut ha ka 10 tarik uni u bnai hapoh ka Syiem Aitnar yong ka chnong Ialong deiwa chimbynta chongchit ki khon ka Raij dei chaad i kyriaw chirup i sur ka bom ka bhuri kamjooh leh i wanrah ya ki Rong ki Rot ha Aitnar deilang ki khubor cha u paidbah waka imlang sahlang.
Najrong ki paidbah wa boon, da wan sakhilang leh ya kani ka Behdeiñkhlam da u Dy. CM ka sorkar jylla, u Sniawbhalang Dhar kam u kongsan, u Montri ka chnat i chait i khiah wa Sports, u Wailadmiki Shylla kam u symbood kongsan hei emlang ki MDC ka JHADC wa kynthup ya u Dy. CEM, u Lasky Rymbai, u Moonlight Pariat wa u Reformingson Lamare.
Neitæ u Dolloi ka Elaka Jowai, u Puramon kynjing, u Dolloi ka Elaka Nangbah, u Moonlight Garod, ki khlieh yong ka niam yong ka raij na ki Seiñraij waphær waphær wa kiwi kiwi.
Kamwa ka thong yong kani ka Behdieñkhlam toh yow beh ya ka khlam, i kjut chitom wa i sih wa boonjait haka imlang sahlang dei wow e ngooh e dem leh ya u Blai Trekirot yow theh u i kyrkhu ha waroh ki liang, kamtæ neiliang u Sniawbhalang Dhar wa u Wailadmiki Shylla leh hawa klam chim ki ka laad wow e khublei Behdieñkhlam wasuk wakmen ya waroh ki khon ka Raij yow yoh dei chait i khiah wa i kyrkhu kyrdoh.
U Wailadmiki ong u wa nachwa kani ka Aitnar man ko kawa tlær wei slah pat neiwa joor ware i ktieh, ha uni u snem won ym em de ktieh, i daw toh wa dapoi i roi i paar wei da pynchna pynbha ya kani ka thaw.
Ong haroh u wa ka chnong Ialong toh hok hi u yoh ko yei roi i paar kamwa da yoo chynna yei dur wa man ko katni, neibhah wa man ko ka chnong wa rap phær wei kawa maya yei roi i paar.
Da e khublei u leh ya u Deputy CM wa man u uwa hakhmat wow yasaaid yaklam ha ka sorkar heiyatoh wow pynyoh yei roi i paar hapoh Ri-loom Jaiñtia.
Kamtæ hajrong i roi i paar wa da wanrah ki kam kiwa mihkhmat, kyntu u ya kiwa wan paitke kamjooh ki tre chnong wa i kamraam yong ki won toh u sumaar syndong, u pynmiat pynbha, u pynkhooid pynjngiar yeiwa da yoh.
Neiliang u Sniawbhalang sñiawkmen u wow yoo yei khooid i pliah, i kylla ka chnong Ialong lyngba i wan i roi i paar heiyatoh ki luti syngkieñ kamjooh kani ka Aitnar wa jooh pyndep ya ka chaad niam Behdieñkhlam man-u-snem.
Yaroh u leh ya u Wailadmiki kam u MLA ka thaaiñ wa man u uwa chimkhia u lai yaklam wa kiwa rap hakhlieh ka sorkar neibynta i myntoi i emkaam ki paidbah.
Da e khublei haroh u ya u CM, u Dy. CM, u Prestone Tynsong wa lyngba yong ki tooid i roi i paar ha Ri-loom Jaiñtia.
E khublei kyrkhu kyrdoh u leh ya waroh ki khon ka Raij deiwa yooluti u wow nang phooh nangphieñ ki na ki snem cha ki snem ha ki liang waroh, wei kamwa ku ha i kyrdan u nangku ki leh hei maya niam maya rukom.
Discussion about this post