Ka Behdieñkhlam ka Seiñraij Muthlong kawa jooh pynman khlieh-u-snem ha ka yurim u beh ya ka khlam, i kjut chitom wa i sih wa boonjait ha ka imlang sahlang najrong wow e ngooh e dem leh yow Blai Trekirot yow bha i rep i riang, ha ka 3 tarik uni u bani kani ka Behdieñkhlam dapoi ko cha wakut ha Biar Nohrong Seiñraij Muthlong, heiwa ki chnat Raij waphær waphær wa haap hapoh ka Seiñraij Muthlong wa kynthup nadooh ka Seiñraij Moobandu, Latymphu, Thadsning, Rashai, Mukhap, Pammanik da pynpoi ki ya ki rot ki rong ha deilang i chaad kmen, i kyriaw chirup i sur yong ki bom ki bhuri.
Ha kani ka sngi pynkut da wan sakhilang u Sanbor Shullai, Montri ka chnat Arts & Culture kam u kongsan, u Comingone Ymbon, MLA ka thaaiñ kam u symbood kongsan hei emlang u Dolloi ka Elaka Jowai, u Puramon Kynjing, u Dolloi ka Elaka Shangpung, u Chanki Langbang, ki MDC ka JHADC wa kynthup ya u Rikut Pareiñ, u Soki Lapasam deilang ki khlieh yahkhmat ñiam na ki Raij waphær waphær wa kiwi.
Neiliang u Sanbor Shullai wa u Comingone Ymbon hawa klam da e khublei Behdieñkhlam wasuk wakmen ki ya waroh ki khon ka Seiñraij Muthlong, deiwa yooluti wa u Blai Trekirot u theh kyrkhu u ha waroh ki liang, wei sñiawkmen ki leh u tip wa kani ka Behdieñkhlam leh nang heh ko na u snem cha u snem.
U Sanbor Shullai ong u kamwa ka phang yong kani ka Behdieñkhlam ong ko sarong yei yong i da hi, kyntu u wow em i sñiaw sarong ya jar jiar i ngait wei wow pynneh pynsah ya ka riti dustur ka niam wa ka jaitbru.
Heijooh i por ong u to yn ya duwai kyrkhu kyrdoh kylliang i ha ki sngi ki snem wa chakhmat yow nangroi ha ki liang waroh.
U Finance Secretary ka Raij Muthlong, u Meliyo Lyngdoh hawa khana yei lai luti ka lehniam Behdieñkhlam ong u wa da sdang ki nadooh u bnai March da ka Kñia Khlam wei da pynbood sa ka Thoh Langdoh.
Neitæ ha u bnai July da pyndep ki ya ka lehniam Sangsngi Chai kawa mut yow beh yei kjut i chitom, bood sa ka lehniam Sangsngi heiyatoh wa u symbe kawa man ka lehniam hadien wa dep bet cha ki hali wa ka lehniam Chawah Chaneiñ kawa mut yow beh yei kjut chitom ha ki liang waroh.
Ka lehniam yong uni u bnai August won ong u da sdang ko nadooh i step yong kani ka sngi pynkut hi wa da pyndep da u Chutia neibynta u beh ya ka khlam, i kjut chitom, wei da e ngooh e dem leh ya waroh ki khon ka Raij yow poi suk hawa wanrah ya ki rot ki rong dei wow lait na i oor i haap.
Hadien wa da pyndep ya kani ka chaad ñiam Behdeiñkhlam won ong u ka lehñiam wa sah toh ka Sangsngi Pyrdong Chnong neibynta u pyndep ya ka kñia ka khriam yow beh ya ka ske hapoh ka chnong, poi won sa ka lehniam wa khaddooh ka Sang Sngi Pyrthat yow kñia ya u Syiem Pyrthat khnang yow yoh i kær i da na u slap u phria, ka ærlangthari wei yow yoh ya u khoo u kba wa bha wa miat u rah cha ki yung ki sem.
Lyngba u Meliyo Lyngdoh, ka Seiñraij da e kti haroh ko ya ka dorkhat ha u Sanbor Shullai wa u Comingone Ymbon yow sñiawbha e yarap neibynta u pyndep chna ya ka yung Hall wa dang sahteiñ khnang yow yoh pynemkaam hei wow e sikai ya ki khon ka Raij kiwa man ka pateiñ yong ka ñiam wa ki chnong ki thaw ka imlang sahlang.
Kyrpaad haroh ki wow yarap pynchna yingkieñ lai kjat ha Khloo Blai ka Raij khnang yow suk ki hawa lai pyndep ya ka Kñia Sang Sngi Thoh Langdoh ha ka Duwan kawa em ha kani ka khloo kyntang, neibhah hawa lai ki cha kani ka duwan hap kaap chiliang ki ya kawi ka wah kawa booh hei maa ya ki heipor slap, weiwa ha ka chisnem ym duna yaka 6-7 sien hap ki u lai pyndep niam.
Neitæ sa iwi paan yarap haroh ki neibynta u kær kynroh soodong ka duwan khnang yow lait nei chah leh pynsih.
Waroh ki rot ki rong wa poi ha kani ka sngi da em ki 22 tylli.
Discussion about this post