Ka Meghalaya High Court da pyndam ko ya ka POCSO Case pyrchah ya uwi u bru uwa 27 snem i rta hadien wa ka kynthai wa chah pynbaad slaitbor u da chong da im ki deilang kam ki chi kurim wei kani ka kynthai toh kawa da em 21 snem kattæ.
Neiliang ka kynthai da ong ko wa ha i por wa chah e FIR u chynrang ha u snem 2023 ha Khliehriat Women PS, ka man ko chi chan wa uni u bru. Wei kattæ da im ki kam ki chi kurim da boon snem wei da pdiang leh yeini da ki ar yung.
Kini ki chi kurim da em ki leh i khon chynrang wa 10 bnai kattæ.
U kurim toh uwa kreh mylla sngi katwa ka kynthai toh ka wym em kreh wei lai skur ko hadooh Class IX donhi wei sah ki ha yung bei ka kynthai.
Ka High Court da pait ko leh ya kiwi da kam kini ki mukotduma kiwa da dawa wow pyndam noh ya ka POCSO Case kamjooh i rukom man ka imlang sahlang ha Meghalaya heiwa i yoh kurim dang khian toh iwa jia neipor cheipor.
Wei kamwa man kattæ kani ka kynthai leh ym em pyrchah ko yei pyndam ya kani ka POCSO Case pyrchah ya u kurim ko.
Hajrong kini waroh, ka High Court ha ka hukum wa da pynmih da ka Chief Justice, ka Revati Mohite Dere ha ka 12 tarik uni u bnai da pyndam ko ya ka FIR kamjooh ya ka POCSO Case pyrchah ya u chynrang.
Da phah leh ya ka District Child Protection Unit wa ka District Legal Services ka East Jaiñtia Hills wow pyntikna wa ka kynthai kamjooh i khon ko yoh myntoi ki na ki Scheme ka sorkar kam ka Mission Vatsalya, Beti Bachao Beti Padhao, Meghalaya Victim Compensation Scheme, Meghalaya Health Insurance Scheme, Ayushman Bharat-PM-JAY, Mission 1000 Days-Meghalaya, Rashtriya Bal Swasthya Karyakram, Chief Minister’s Safe Motherhood Scheme wa kiwi de.
Discussion about this post