Uwa chong chnong ka Dona Bhoi, East Jaiñtia Hills uwa tip kam u Sarthe Teron da booh FIR u ha Umkiang Police Patrol Post pyrchah ya ki bru wym tipmit kiwa suba toh kiwa Bangladeshi kiwa da psiah yabor wei tooh ya ka yung ka sem deiwa maham pynyap.
Ini da jia i ha ka 20 tarik uni u bnai heipor kamwa 3:00 waje i step heipor wa u Sarthe deilang ka kurim wa ki khon dang thiah ki wei heini i por wa joor bha u slap, da em kamwa 5-6 ngut ki bru wym tipmit kiwa suba toh ki Bangladeshi kiwa da tympra ya ka dwar yung nadien wei da psiah ki chapoh yung.
Kini ki bru da kdoh ki ya u Sarthe deilang ka kurim wa ki khon u heiwa da maham ki deiwa booh da ka wait ha rdang u wa daw pynyap ki oo lada awri u.
Kamtæ kini ki bru da kynreh ki yei yung i sem, da tympiah ki leh ya ka almari heiwa da tooh ki ya ka poisa kawa Rs. 30,000, kawi ka Smartphone, ki sula wa dang thymme, ki manu skur ki khon, ki tiar ki tar wa pynemkaam ha yung wa kiwi de ki mar wa em hapoh ka amlari.
Hadien wa yut kini ki damok, da ye kini kiwa chah kdoh wow lait wei da lai pyntip cha kiwi jan yung heiwa da ya mih ki wow thooh ya kini ki bru tangwa ym em chem de ki deiwa suba wa yut ki cheiliang Bangladesh.
Neiliang ka KSU-Narpuh Circle hei yahkhmat, u President, u Phanuel Tongper, mar ya tip yeini da lai ki cha kani ka yung heiwa da chem wa u Sarthe Teron toh uwa jooh man kam u waheh chnong warim ka Dona Bhoi kawa em marjan wa ka chnong Umkiang.
Kani ka manyung toh kawa em 3 ngut ki khon khian wei da pyntip wa da chah kdoh ki da u tylle Nylon na kti wa kjat.
Discussion about this post