Ka seiñ kiwa riñdur wei chondur ka Ri-loom Jaiñtia wa tip kam ka Jaiñtia Photographers and Videographers Association (JPVA) ha ka 20 tarik uni u bnai da sdang ko ya ka Jaiñtia Photo and Video Fest wa ar sngi ha Chutwakhu Indoor Sports Hall Jowai.
Ha kani ka sngi sdang da em ka Photo Exhibition, Video Screening, Art Display, ki Stall waphær waphær, ka Musical Evening kamjooh ka Workshop e sikai heiyatoh wa i rukom chondur riñdur.
Hei yaklam wa u President ka JPVA, u Jomanson M Passah wa u Vice President, u Ruhi Phawa ong ki wa hei lailuti nadooh u snem 2025 da pynman haroh ki ya ki Workshop ha West wa East Jaiñtia Hills yow pynsñiawthooh ya ki khynroo khyllood heiyatoh wa i chondur riñdur kawa da man leh ka laad yoh khih ha ka juk saja khih katni.
Lyngba ka JPVA khana ki wa em haroh ki i angnood wow sdang ya ka Training Course chondur riñdur, deiwa yooluti u yoh i yakrehlang na ka sorkar, neibhah wa kani leh toh ka laad ya ki khynroo khyllood wow ye ki u yieñ hei yong ki hi i kjat.
Chooh chooh ong ki wa ka seiñ em ko i yoo jngai neibynta ka mynried kiwa riñdur chondur ha ka District wa ka jylla yow im-ja bait ki du na kani ka kaam kamwa man cha baar næ kiwi won ki thaw ka ri.
Itæ deiwa yooluti ki wow em ki laad ki luti neiliang ka sorkar wow e yarap kyrchaan ko ya ki kam kiwa riñdur chondur khnang yow ye ki u sdang yei kaam.
Yooluti haroh ki wa ka sorkar u yarap ko ya ki deiwa e ki Project ha ki kam ka seiñ ki bru ka jylla ka thaaiñ hi neibynta u chondur riñdur ya ki chnong ki thaw ha ka jylla, yei rukom im ki bru, ki thaw uiñke suwari wa em ha ka jylla wa kiwi yow pynyoo cha ka pyrthai soodong iyi em i.
Neitæ kamwa ka jylla Meghalaya toh ka thaw wa khriñ ya kiwa uiñke suwari, hadooh kiwa chna Film kiwa na baar jylla, yooluti ki wa neini chakhmat lada em i yakrehlang kiwa wan na baar wa kiwa chondur riñdur ka thaaiñ deiwa yarap ka sorkar wei i myntoi leh daw man iwa pynmyntoilang.
Discussion about this post