Ym yoh u SP wa u DC wow embynta ha ka Committee wa takit ya ka Shree Cement | Pynsangeh ka KSU yei yakhih

Ka Khasi Students’ Union (KSU) da rai ko wow pynsangeh chwa chipor yei yakhih hadien wa dadep yaklam wa ka sorkar hajrong ki 5 tylli ki mat wa ka seiñ da dawa ko.

Hawa pyntip yeini i rai hadien ka yalang wa ka sorkar, u President warim ka KSU, u Lambokstarwell Marngar da ong u wa ka sorkar pdiang wei da kular ko kamwa 70% na kiwa da dawa ka seiñ yow pynkrehkaam na waroh 5 tylli ki mat wa da dawa.

Hawa yatoh wa i pyndam ya ka Public Hearing ka Shree Cement, uwa yahkhmat ka KSU da ong u wa ka sorkar da mynjur ko wow thung ya ka Fact Finding Committee, heiwa u Deputy Commissioner wa u Superintendent of Police ka East Jaiñtia Hills ym embynta ki wei da phah pynsangeh leh ya waroh i pynkreh ka Shree Cement.

Hawa yatoh wa ka khyrdop yow kynreh mynder hapoh ka aiñ MRSSA, da ong u wa kini toh u pynyieñ noh, khamtam ha kitu ki thaw wa rap emkaam heiwa ka sorkar da ong ko wow sdang noh. Da pyntip u wa hei yaklam da kular wa daw em i lai paitlang ha Umling neibynta katæ ka Food Court, wei hapoh ar bnai da yooluti wa ka khyrdop daw yieñ noh ko wei toh u embynta waroh ki chnat waphær waphær.

Heiyatoh wa ka aiñ kiwa kreh mylla, ka Meghalaya Identification, Registration (Safety & Security) of Migrant Workers, da ong wa kani ka aiñ toh kawa dang synjor palat, da ong u wa ka sorkar ynne ka sngi da kular ko wa kani ka aiñ daw krehkaam noh ko ya ki baar jylla wym yoh de ki u laitlan, khnang wa ki damok na kiwi ki jylla ym yoh ki u rieh kmen.

Related posts

Ym em dawa ka KSU wow pynlait ya ki dkhot wa chah kem

August 26, 2026

U sangeh chwa i kreh ka Shree Cement kat wym pu dep u pynman yei takit: Conrad

August 26, 2026

Hawa yatoh wa ka bhah wei rukom thung kreh ha NEIGRIHMS, da pyntip wa ka sorkar da kular ko wow yah ya ki dkhot ka KSU yow yachem wa u Health Minister ka sorkar pyrdi hajrong ki mat ka NEIGRIHMS.

Hajrong i pynbait thymme yei rukom thung kaam ha MPSC, DSC wa kiwi ki chnat sorkar, u Lambok da khana u wa ka sorkar da pyntip ko wa neibynta ki kaam Grade C wa D da pyndam ya ka Personal Interview, katwa ha ki kaam Grade B dang emkaam wei hap wow pynbiang yeiwa emkaam. Da ong u wa em ki bynta wa ka seiñ da e buit ko wei da pynpsiah hei pynkylla wei da pynrap u wa i thung kaam wei psiah kaam deiwa psiah na dwar dien toh u dooh u dam noh ki.