U Education Minister ka jylla, u Lahkmen Rymbui ynne da beiñ joor u ya kiwa beiñ yei Pass bha ki khynnah ha ka SSLC heiyatoh wa ku ka Pass Percentage na ka 50% cha ka 96% lyngba ka CM IMPACT.
Yeini da jubab u ha ka phang yañia wa wanrah u MLA ka UDP na West Shillong, u Paul Lyngdoh heiwa u Lahkmen da ong u wa ka sorkar ym em bynta ko hei wow Pass bha ki khynnah.
“Neiyi i daw wa sñiawsih phi hawa Pass ki khynnah? Iyi i daw em phi wa ki? Ileh kwah phi wow Fail ki mo?” da kylli u Lahkmen.
Da e ñia u wa ki khynnah ha sor ye ki wow lai Tuition, katwa ki khynnah wa duna hei yoh i laa wa kiwa em cha palatsor emkaam ki yei yarap ka sorkar. Da ong u leh wa ki Guide Book toh kiwa em boon kiwa da pynmih da kiwa boon.
Heijooh i por da ong u wa ki dukan dai kot yarap pynmyntoi ki ya ki karkhana wa chon wei pynmih ya ki wei ki khynnah ka Meghalaya leh emkaam ki yei kyrchaan wei yarap neibhah chisien wa Fail ki chi snem da dam ki wow bood yei puræ, kamtæ deiwa sdang yeini, ka Drop Out Rate namo ka pep skur chiteiñ por ki khynnah da hiar i da 6.2%.
U Lahkmen da kdaw u leh yei khia heiyatoh i lut i sep ka sorkar wow pynku kyrdan ya ki skur kamjooh ki College.
Da kyntu u leh ya waroh wow e ya ki buit ki budia kammon wow pynjanai ya ka CM IMPACT, deiwa pynrap leh wa ini toh u myntoi donhi ki khynnah.
Khaddooh da e khublei u ya u Chief Minister heiwa ki 19 tylli ki College da yoh yarap ki na ka People’s College Scheme ha ka jylla.
Discussion about this post