Ha ka 5th Convocation Exercises Class of 2026 yong ka North East Adventist University, Khliehtyrshi, West Jaiñtia Hills District, ki 229 ngut ki khynroo khyllood wa lai puræ wa da pyndep yei puræ Graduation ha ki chnat puræ waphær waphær wa kynthup ha ka BA Political Science, English, History, Education wa Sociology neitæ ka MA English, History, Education, Political Science wa Sociology kamjooh ha ka BSc Nursing, B.Com, BBA, DMLT wa BSCMLT, da chah pynkup burom ki ha ka yalang wa da pynman ha ka 28 tarik uni u bnai ha Auditorium kani ka skurbah, heiwa u A.L. Hek, MLA ka Pynthormukhrah Constituency da wan sakhi u kam u kongsan chirup i emlang kiwa sikai, kiwa pynlai kani ka University najrong kiwa chah khut sñiawbha wa kiwi.
Ha kani ka sngi, ka University da pynkup burom kyrpang haroh ko ya ki 6 ngut ki khyllood wa poi chakhmat ha ka Result yong deiwa man kam ki Gold Medallist wa kynthup ka Sawahaka Dan ha ka Master of Arts Education, ka Dahunshisha Sukhlaiñ ha ka Master of Arts Political Science, ka Pretty Dkhar ha ka Bachelor of Business Administration, ka Larisa Lamin ha ka Bachelor of Arts Political Science, ka Melody Laldintluangi ha ka Bachelor of Science, Life Science wa ka R. Vanlalmalsawmi ha ka Bachelor of Arts Sociology.
U A.L. Hek hawa klam kam u kongsan pynsñiaw u i kmen wow yoh emlang ha kani ka sngi wei hawa e khublei pyn-eh-daw u ya waroh kiwa chah pynkup burom, kyntu haroh u wow man ki khon wa tipbru tipblai deiwa maya para bru wei wow maya ya u Blai.
Sñiawkmen haroh u wow tip wa ha kani ka thaw puræ ki khynnah toh kiwa wan na kylleiñ ki jylla ka ri, wei ngait skem u leh wa sñiawsuk ki u im hapoh ka jylla Meghalaya wa yoosuk, deiwa pynsñiaw u leh i sarong wow man u uwa chong chnong ka Meghalaya.
Hawa e mynsien ya ki khynroo khyllood wa chah pynkup burom ong u hei im hap maad chiboon i eh wei i ye yong ki u poi hadooh kani ka sngi leh toh lyngba boon i eh wa da lai luti ki chadien ha chirup i kreh chitom ki bei ki pa u pynyoh yei emkaam ki khon.
“Hei im hi lada khlem i eh ym ye u jop næ poi cha ka thong, wei hei im teiñ teiñ sñiaw kam wym em laad de, tangwa lada em i ngait ha u Blai, oo hi wow pynyoo ki laad ki luti kammon u jop ya waroh i eh,” da ong u Hek.
Pynrap u deiwa ong, waroh em phi jar jiar i thmu neini chakhmat, kamtæ ha kawon kawon ka luti wow lai man-ka-sngi, næ hei kaam wa kreh toh u man kiwa sñiawthooh bha ya idæ, neibhah kam ki bru ym ye lait nei tynjooh, wei hawa ye u kdoh u khoom pyn ya idæ daw ye leh u pynlai yei im yong i hi ha ka luti wa bha.
Kamwa neini chakhmat dang jrong i lai luti yooluti u wow jop ki ha kawon kawon ka luti wa lai.
Neiliang u Ch. John Victor Chancellor, NEAU hawa klam e mynsien u ya ki khynroo khyllood, ong u, “Teiñ teiñ hei im ym ye u yoh lut yeiwa kwah, tangwa toh u man kiwa yaichah wei thom yei eh dei kreh chitom, i chlur, i chaniah ya idæ, dei wow lai bait chakhmat ha chirup i em kyrmen wei hanla ym ye u jop heiwa sdang leh manda pyrchang daw poi hi cha ka thong”.
“Phi man phi ka mynried yong ka ri wei hei im ye u man ym biang lut nadong chadong, tangwa emkaam u pynyoo yei man hok hei im, u leh iwa bha tam, u maya ya ki para bru, u maya ya u Blai, u burom ya idæ wei burom ya kiwi heiwa i nong yong i lehbha daw wan hi ko hadien,” da pynrap u Ch. John Victor.
Ha kani ka sngi da yoh leh i klam na u Prof. (Dr.) Anil Kumar Chillimuntha, President & CEO, MESTA Group of Institutions, na u Dr. L.F. Lyngdoh, President Allumni Association, NEAU wa kiwi.
Neitæ da em leh i rwai, i tem sur tynre, i pure Bible wa kiwi kiwi.
Discussion about this post