Ka Seiñ Kur Sutnga 14- Khrong Jowai Circle haka 12 tarik uni u bnai da sdang ko yei lehkmen dap 25 snem namo ka Silver Jubilee ha ka yalang wa da pynman ha Community Hall ka Dorbar Chnong Mynthong, Jowai hei wan chimbynta ki khon ka kur wa chong wa sah ha Jowai.
Ha ka yalang wa pynlai da u President, u Tbn. Backland Pajuh da yoh i duwai sdang na u Starly Shadap Passah, i klam pdiang na ka Rinibeth Patlong, i rwai pdiang na ka Khimusniang Unit, i puræ ya ka History ka kur na u General Secretary, u Tbn. Hunmon Sutnga.
U Seibor Shadap, MDC JHADC kam u kongsan yong kani ka sngi hawa klam da yaroh u yei lai luti ka seiñ kur wow poi cha uni u moomær dap 25 tylli ki snem deiwa ong ymtoh iwa suk ya ka seiñ kur u lai luti khamtam ya kiwa yahkhmat neibhah hap maad ki chiboon i eh i khor.
Sñiawkmen u leh wow yoo yei yaboon ki kur wa em ha Jowai deiwa e yumut u wa toh u em i yachemlang chisien chisnem hapyrdi ki kur wa em ha Jowai wa kiwa em ha thaaiñ Sutnga kiwa kynthup ya 14 Kur yow yoh i ya tipmit para kur, u yoh i yasneiñ yakroo khnang yow lait nei chongkha khleh.
Kyntu u leh ya ki para kur wow e mynsien ki ya ki waheh wa yahkhmat yow ye ki u kreh da iwa bha tam neibynta ka kur. Heijooh i por yooluti u wa ha ki snem wa chakhmat ka seiñ u nang ku nang ku ko ha waroh ki liang.
Ha kani ka sngi u kongsan da pynhær haroh u ya ka lama ka kur wei da pynlait paidbah u leh ya ka Souvenir.
Da pynchongchit ya kani ka sngi da i chaad na ki khon ka kur na ka Pohshnong Unit.
Da pynkut ya ka yalang da i klam e khublei na ka Leitmon Sutnga wa i duwai na u Rev. Harasing Pajuh.
Ki kur wa haap hapoh ka Seiñ kur Sutnga 14- Khrong kynthup ya ki yong Law, Muliar, Patlong, Pajuh, Palem, Pasleiñ Sutnga, Sutnga, Shadap Passah, Salahe, Saio, Shadap Sutnga, Syiemlieh, Sdhui wa kiwi.
Discussion about this post