Ka yalehke ka Shillong Premier League 2026 hadien wa dep ka Shillong Lajong u jop deiwa suk da 6-1 ya ka Sawmer ha ka 12 tarik, ynne won da rai pynrem noh ya ka Lajong neidaw wym em bood ko ya ki kyndon hawa pynemkaam ya kiwa yalehke.
Neiliang ka Sawmer da booh ko ya ka ujor pyrchah yei pynemkaam ka Lajong da kiwa yalehke kiwa wanrah na baar khlem da bood kyndon.
Neiliang ka Tournament Committee ka Shillong Sports Association ynne da chong bichaar ko yeini heiwa ka Lajong da chah pynbaad ko wa pynemkaam ko le ngut kiwa yaleh ki wym toh kiwa na Meghalaya ha ka yalehke wa da pynman ha ka 12 tarik.
Ha ini i bichaar da ya emlang kiwa mihkhmat na waroh ar tylli ki Club heiwa da e laad ya ki wow pynsñiaw ki.
Hadien wa da ap ya waroh arliang wei da pait bniah ya ki kot ki sla deilang ki kyndon pynman yalehke, neiliang ka Committee da chem ko wa ka Shillong Lajong da tyngkheiñ ko ya ka Rule 9 ka SPL Guideline, kawa da ong wa u chah du ar ngut kiwa yalehke kiwa na baar ka Meghalaya ha ki 11 ngut kiwa yalehke.
Kamtæ da rai pynrem ya ka Lajong heiwa da e yei jop cha ka Sawmer deiwa kheiñ wa jop ko da 3-0.
Ka Lajong ha kani ka yalehke da pynemkaam ko ya u Lakpa Lama wei hadien won da sai ko ya u Lalmuansanga wa u Abelson Jachi kam ki Substitute.
Ka Lajong kattu da em ko 11 Point na ki 6 tylli ki yalehke katwa ka Mawlai won da em ko 10 Point na ki soo tylli ki yalehke. Ka Sawmer won da ku ka na ynñiaw chei wa soo deiwa yoh 9 Point iwa kat jooh wa ka Langsning.
Ka yalehke wa bood u pynman ha ka 16 tarik heipor 5:00 waje i janmiet hapyrdi ka Mawlai wa ka Langsning.
Discussion about this post