Ka Meghalaya State Senior Athletics Championship 2026 da sdang ko ynne ka sngi deiwa em 267 ngut kiwa yalehke (Athletes) na waroh 12 tylli ki District kiwa da wan cha ka Shillong yow pynyoo yei sap i tap ki.
Ka Ri-Bhoi ha kani ka sngi sdang da yoh ko 6 tylli ki Gold Medal, 1 Silver wa ka 1 Bronze. Ka Eastern West Khasi Hills won da yoh wa ar ko deiwa yoh 2 tylli ki Gold, 1 Silver wa 2 tylli ki Bronze katwa hei wa le da em ka West Jaintia Hills kawa da yoh 1 Gold wa 3 tylli ki Silver.
Kani ka lympung yalehke toh kawa pynman da ka Meghalaya Athletics Association (MAA) deiwa kyrchaan ka Directorate of Sports and Youth Affairs ha Sports Authority of India Centre ka NEHU Shillong Campus.
Kani ka Championship da pynman biang ka hadien 18 snem kam chibynta wow pynkhreh ya ka 39th National Games kawa daw pynman ha Meghalaya mynried snem.
Na kiwa chimbynta da em 166 ngut ki chynrang wa 101 ngut ki kynthai ki wow chimbynta ha ki 37 tylli ki jait yalehke. Da em leh 120 ngut ki Technical Officials kiwa wan leh na ka Athletics Federation of India (AFI).
Yei smai neibynta kiwa yalehke da chim da u Renaldi Dhar uwa yalehke ka West Jaiñtia Hills.
Ha kani ka sngi sdang da pynthut leh u slap heipor wa phet ya ka Final 100m wa 1500m ki chynrang wa kynthai.
Ka Monlangki Kyndait na WJH da jop ko ha ka 1500m ki kynthai deiwa pyndep yei phet heipor wa 5 minutes 25.86 seconds, katwa u Marshal Wanniang na EWKH da jop u ha ka yong ki chynrang deiwa pyndep hei por wan 4 minutes 8.29 seconds.
Ha ka 100m ki kynthai da jop ka Phibakmen Rynghang (13.07 sec) na Ri-Bhoi katwa u Banraplang Lapang uwa na Ri-Bhoi hi da jop u ya ki chynrang deiwa pyndep hei por wa 11.02 seconds.
Discussion about this post