Ha ka 14 tarik uni u bnai, neiliang ka Iakrehlang I (VO) Mihmyntdu da yoh ko u wai yei yung wa da yahkhmat u chna da ka VO Mihmyntdu chirup i ya krehlang wa i yarap na ki SHG yong ka chnong Mihmyntdu kiwa da kyrchaan kyllooid mynsien.
Ya ini i yung da chna ya ka Lucy Rymbai kawa man leh ka khonswet kawa jooh im hei yung trep donhi ha Lumchyrmit Mihmyntdu kawa em 3 ngut ki khon katni wei u kurim ko leh toh uwa kjut wa chimtom i khlieh.
Ya ini i yung da wan wow wai wei da e kti leh kamjooh cha ka tre yung da u waheh chnong ka Mihmyntdu, u A. Phawa chirup i emlang u waheh dong ka Lumchyrmit Mihmyntdu, u Y. Lyngdoh ryngkat ki dkhot yong ka VO kamjooh ki SHG yong ka chnong Mihmyntdu.
Ya ka yalang wa tbian da pynlai da ka President ka VO, ka R. Ryngkhlem wei da yoh ki kyntien pdiang burom na ka Secretary ka VO, ka S. Shylla kawa da khana leh yei luti wa da lai yow chna ya ini i yung wei da e khublei ko leh ya u waheh chnong wa da yarap kyllooid mynsien u chna ya ini i yung kamjooh leh na ki kattu katni ngut ki waheh ka chnong Mihmyntdu.
Ka Secretary da e khublei ko leh ya waroh kiwa embyntalang u e sñiawbha nadooh iwa khian dooh hadooh iwa heh dooh wei kamjooh ya waroh ki SHG ka chnong.
Ya ini i yung da chna ha i lut wa Rs. 2,62,040 da ka poisa wa yoh yarap donhi na ki SHG kamjooh na ki kattu katni ngut ki waheh ka chnong Mihmyntdu.
Neiliang u waheh chnong da yaroh u ya ki VO ka chnong wa ya ki manbei kiwa da yoo jngai u yahluti u yarap ya kiwa dooh wa duk ka chnong wei da e mynsien chooh chooh u wym toh u ap yei beiñ i kynnoh wei iwa emkaam toh u yieñ skem ha ka yurim yow yoh u kreh bha kreh miat chooh hapoh ka chnong waroh kawi ha kiwa boon ki liang.
Discussion about this post