Ynne i step synyaaw ka 17 tarik da jia i chah thang wei chah kawang Petrol Bomb ha kiwa boon ki thaw ha Shillong.
Katkam ka khubor wa da yoh, heipor kamwa 3:55 i step, ka thaw chong ki pulit (Police Booth) kawa em ha yaaw Nongmensong hajan ka laad wow lai cha BSF ha Umling da chah thang ko ha ki bru wym tipmit.
Da yoh khubor leh wa kawi ka kari wa em ya u Number ML-01-7702 kawa pynyieñ ha Health Complex yong ka yung krehkaam ka DHS ha Shillong da chah thang ko heipor kamwa 3:10 i step, wei kani ka kari Bolero da iñ bha ko na i bynta iwa nakhmat. Ha ini wa jia leh ym tip kiyi wa emkti wei da suba wa chah kawang da u Petrol Bomb ya katai ka kari.
Sa iwi i jia iwa da jia heipor 10:00 duna ynnin i miet, ka Lumdiengjri Police Station da chah kawang Petrol Bomb ko ha ki bru wym tipmit tangwa ym em iyi iyi wa chah ktah neidaw wa u Petrol Bomb da haap u ha ki bynta wa cha kdong.
Kam wow pynkynmoo wa ynnin ka sngi da em leh wa kawang Petrol Bomb ar tylli ya ka yung krehkaam ka DMR wa em ha Cleve Colony, Shillong heiwa kawi ka kari da iñ ka Bonnet ko katwa uwi u Petrol Bomb won da pdung u hawa toh hei kynroh.
Discussion about this post