Ki MLA ka United Democratic Party (UDP) kiwa da khreh wow lai noh cha ka BJP da e por ki hadooh ka 30 tarik uni u bnai ya ki heh ka BJP ha Delhi wow pyntikna ya ki kular wei wow pynche hajrong ki mat wa da dawa, wei lada kiwa yahkhmat ka BJP ym ye ki wow pynche, i angnood ka BJP wow yoh boon ngut ki MLA ha Meghalaya ye ko wow sahteiñ chwa sa kattu katni por.
Katkam i pynkhreh kawa da lai rap nachwa, ki 8 ngut ki MLA ka UDP kitæ u Lahkmen Rymbui, u Kyrmen Shylla, u Mathew Beyondstar Kurbah, u Synshar Kupar Roy Lyngdoh Thabah, u Balajied Kupar Synrem, u Mayralborn Syiem, u Pius Marwein wa u Olan Sing Suin da lai ki chakhmat wow psiah noh cha ka BJP ha uni u bnai hadien wa da yasyllok wa kiwa kyrchaan ha ki Constituency yong ki.
Tangwa da em noh i pynkylla neibhah kamwa man kattæ, kini ki MLA ym pu che ki yeiwa mut ka BJP hajrong ki mat wa da dawa ki, kamtæ da boohteiñ chwa ki deiwa e por hadooh ka 30 tarik uni u bnai.
Ki mat wa hakhmat dooh wa ki MLA ka UDP da booh ki ha kiwa yahkhmat ka BJP toh wow tipmit ya ka ktien Khasi ha ka Eight Schedule, i mynjur wow pynkrehkaam ya ka MRSSA, u pynlait biang noh yei kaam tih mooyong, wow kyrriah noh ya ki bru na Them Metror (Sweeper lane) wei wow tipmit kam ki niam khian paaid ya ki Seng Khasi wa ki Niamtre.
Hajrong kini ki jooh ki mat da yoh khubor wa ha ka tayaaw wow wan, ki 8 ngut ki MLA daw yachem biang ki wa ki heh BJP ha Delhi hajrong ini i kaam, wei lada ki heh BJP ym ye ki wow pynche, ki 8 ngut daw hap pynsangeh chwa ki yei thmu yong ki wow lai cha ka BJP.
Hanla ki heh ka BJP da kular ki wow pynkrehkaam ya iwa da dawa, neiliang kini ki MLA da klam che ki wa ini wa da dawa toh u pynmankaam bait hachwa ka Election 2028.
Discussion about this post