Ka Meghalaya High Court da phah ko ya ka sorkar jylla wow kyrriah ya waroh ki baar ri wa chah kset patok cha ki Detention Centre hapoh ka 28 tarik uni u bnai hadien wa kut i por wow kset ya ki.
Ya ka hukum da pynmih da ka Division Bench wa kynthup ya ka Chief Justice Revati Mohite Dere wa u Justice W Diengdoh ha ka 21 tarik uni u bnai katwa bichaar ya ka mukotduma wa yatoh wa ki baar ri wa chah kset.
Ka miej bichaar da paan yukheiñ ko leh na ka sorkar jylla wa ka Foreigners Regional Registration Officer (FRRO) heiyatoh wa i rukom su cha ki baar ri wa chah kset palat yei por.
Katkam ka bui na ka sorkar, da em 30 ngut ki baar ri wa chah kset palat yei por tangwa dang neh ki ha patok.
Neiliang ka sorkar da tyrwa ko wow kyrriah ya kini ki bru cha ka MBoSE Hostel kam ka thaw booh ki chipor kawa em le mala deilang 6 tylli ki Dormitory wa em 60 tylli ki palong wei daw booh leh ki Guard deilang kiwa kreh chirup kiwa chet.
Ka yung bichaar da hun ko yeini wei da booh por hadooh ka 28 tarik wow leh yeini wei wow pynuiñ smat leh ya kini cha jar jiar ki ri ki.
Ka FFRO da pyntip ko wa da em soo ngut kiwa da pynkhreh wow pynliwan heiwa da pynmih hukum wei da em leh kiwi ki ar ngut kiwa Myanmar, ar ngut kiwa na Nigeria wa uwi uwa na Bangladesh kiwa dang yaleh yow phah liwan noh ki kiwa dadep chong patok da palat san snem.
Discussion about this post