U Deputy Chief Minister uwa man leh u National Vice President ka NPP, u Sniawbhalang Dhar da kyntait u wa ki MLA ka NPP da pynkhreh ki wow psiah cha ka BJP hadien ki 8 ngut ki MLA ka UDP deiwa ban joor wa waroh ki 33 ngut ki MLA ka NPP em ki chirup wei ka sorkar MDA man ko kawa yatylli.
U Sniawbhalang hadien wa wan na Delhi deilang wa u Chief Minister, u Conrad K Sangma wa u Deputy Chief Minister, u Prestone Tynsong da ong ki wa i lai Delhi toh yei kaam sorkar.
Da kyntait u wa em i yaphær hapoh ka Party deiwa ong wa ka yung ka NPP man ko kawa yatylli wei u Conrad K Sangma, u Prestone Tynsong wa u Sniawbhalang Dhar em ki i jooh i pyrkhat.
Da kyntait u leh ya ka khubor wa em ki 22 ngut ki MLA ka NPP kiwa em ha Delhi wow yachem wa ki heh ka BJP.
U Sniawbhalang da wyrai u leh ya kiwa pynmih kam kini ki khubor ha Social Media deiwa pynrap wa chah rkhai beiñ ki ha ki paidbah.
Heiyatoh wa i chah ktah ka sorkar MDA nei psiah ki 8 MLA ka UDP cha ka BJP, u Sniaw da ong u wa ym chah ktah ka sorkar.
Da pynrap u deiwa ong wa da synchaar ya ka sorkar la phra snem tam heiwa ha u 2018- 2023 da em ka NPP 19 MLA, katni won 33 ngut deiwa e khublei ya kiwi kiwa em ha ka sorkar synrop kiwa pteiñ wow kyrchaan ya ka sorkar.
Heijooh i por da kyntait u wa em i dawa na ka BJP wow pynku yei yoh chuki Montri ko.
Discussion about this post