Uwi uwa chong chnong ka Pamrapaithlu, EJH uwa tip kam u Augustine Siangshai uwa em kamwa 38 snem haroh i rta, da dooh noh u yei mynsien heipor wa lai khwe wa ki lok u ha Leshka.
U Agustine wa ki le ngut ki lok u da lai khwe ki ha ka 30 tarik u September ha Leshka ha ki bynta wa em chaneiñ ka Dam heiwa da chong ki da ka lieñ kamwa 40 minit haroh yow poi chei thaw khwe.
Dapoi ki cha ini i thaw hadien i por chiteiñ sngi wei hawa chong khwe da khai riñ syndet u Augustine neidaw wa em u yeini i chitom wei da haap u chapoh ka um kawa rap yillu hanla em pyn harood leh.
Yei metyap da ye u sai ynne heipor kamwa 12:00 waje pyrdi sngi da ki bru ka Search & Rescue Team yong ka Fire and Emergency Services.
Ha kam ini i wa jia sñiawsih da pynkynmoo yei emkaam u sap ya ki Life Jacket wot heipor wa lai khwe leh.
Ya u Augustine u tlep ha ka 2 tarik ha loom tlep-bru ka Balang Katholik Pamrapaithlu heipor 1:00 waje i sngi.
Discussion about this post