U bru uwa tip kam u Banphrangkupar Nongbri uwa da pynyap ya ar ngut ki kynthai ha ka 23 tarik u August u snem 2021 ha Nongstoiñ, da chah rai phah kset u waroh chi rta khlem da em laad wow lait wei u neh u hapoh patok hadooh ka sngi wa yap u.
Heipor wa jia ini, u Banphrangkupar Nongbri da em u 24 snem i rta heiwa da pynyap u ya ka tre yung wa tip kam ka Philisis Syiem (79 snem) wa ka Maitlynti L Marshillong (25 snem) kawa man kam kawa kreh ha ini i yung.
Ka yung bichaar ka District & Session Judge, Nongstoiñ da phah ko leh ya u Banphrangkupar wow su ya ka kuna kawa Rs. 1 lak.
U Banphrangkupar heipor wa leh u ya ini i kaam dang yang u ya ka Result Degree Exam u wei tipmit u leh ya kini ki ar ngut ki kynthai wa pynyap u kiwa wai dwar ya oo wow psiah u cha yung heipor 10:30 i miet.
Yei metyap da chem da u khon ka Philisis hei step hadien wa hap tympra ya ka dwar neidaw wym em wa wai.
Hei takit ki pulit da yoh ki wow kem ya u Banphrangkupar du hapoh chi sngi donhi napoh kawi ka kari ha Mairang.
I daw wa pynyap u ya kini ki ar ngut toh yow lute heiwa ki pulit da chem ki na oo ya ka poisa wa Rs. 64,500 neitæ ki Mobile Phone kiwa chah pynyap kamjooh ki that ki nep deilang ki juti wa pynemkaam u heipor wa leh ya ini i kaam.
Uni u bru mar ya dep u leh yeini i kaam da liwan chwa u chei yung wai wa sah u ha Nongrim Hills, Shillong wei i chnong tre u toh na Nongstoiñ hi.
Discussion about this post