Ka seiñ ki tre Truck wa kiwa yah Truck wa tip kam ka Meghalaya Commercial Truck Owners and Drivers Association (MCTODA), ynne ka sngi da lai yachem ko ya u CEM ka JHADC, u Thombor Shiwat wow pynsñiaw yei eh i khoo yong ki kam ki tre jylla heiyatoh wa duna yoh mylla kit Cement kit Clinker wa kiwi ki mar na ki karkhana Cement wa em ha Ri-loom Jaiñtia katwa ki kari ki baar jylla won biang i yoh kit ki.
Ha i yachem yong ki da emlang u Dy. CEM, u Lasky Rymbai, u EM, u Jesse Suiam chirup ki sahep ka chnat Trade ka JHADC.
Hei yaklam wa u President ka MCTODA, u Moslander Marngar da pynkynmoo u hajrong i yakhih yakhun dohyap yong ki u yoh yei dor bai kit wei wow yoh mylla na ki karkhana Cement.
Tangwa hadien wa da yoh ki yei dor bai kit wa i yoh mylla, iwa pynsñiawsih won ya ki wow chem ki hei lai luti toh wa heithaw u e cha ki tre jylla tangwa da yoh bhah rap boon ki baar jylla u kit u bah ya ki mar na ki karkhana Cement.
Da ong wa na ka 1200 hadooh 1500 tylli ki Loading ha chisngi neibynta u kit Cement, Clinker wa kiwi kiwi ki mar, ki kari tre jylla wa em le tylli ki Association yoh bhah ki du 120 tylli, wei teiñ teiñ na kani ka 120 leh ym jooh yoh tikna ki u kit.
Ong haroh u wa i wym yoh mylla kit tikna da chem chitom ki wot wow su ya ram ki Bank wa chim ki yow thied kari.
Chooh chooh u Moslander khana u wa da em biang i thmu ki wow pynman yakhih pyrchah ya ki Company Cement wa ki Transporter yong ki hajrong i lehbeiñ ki wow e Trip ya ki kari tre jylla, tangwa ka sorkar jylla da e yumut ko wow lai yaklam chwa ya ki Company wa ki Transporter kamjooh cha ki bor wa toh bynta u pait ya kani ka kaam.
Kamwa sñiawthooh ki wa hawa dooh mylla ki tre jylla ha ki Company wa wan na baar, sñiawthooh ki leh u lai ood lai naam cha ki District Council neibhah wa ki em ki yong ki hi ka aiñ, wei sñiawkmen ki leh u chem wa ka JHADC em ko ya ka aiñ kawa yahaap dur wa i kaam mylla yong ki, na itæ i daw chwa wow chim ki ya kawon kawon ka rai yakhih sñiawthooh ki wow e dei thoh wei wow yaklam chwa wa ki bor ka JHADC heiyatoh wa ki aiñ deiwa kdaw leh thij pa thij ya ki kyndon.
Ong haroh ki wa lada ym ye u pynbait yeini ym yohsa ki u chim da ka luti wow pynman yakhih.
Hawa yoh u yaklam won wa u CEM, u Thombor Shiwat, ong u kamwa kini ki seiñ tre Truck wa kiwa yah Truck da wan pynsñiaw ki yei eh, neiliang ka Council leh u chimkhia ko yeini dei wow yaklam hapoh ka EC neibynta u khut yaklam wa ki Company Cement khnang yow lait chah khnioñ ware ki tre jylla dei wow rap pynboon ka bhah.
Heiyatoh wa i em ki bru Pnar hi wa pynchah pyrtuid ya ki kari baar jylla, u CEM ong u wa neini chakhmat daw pynkrehkaam katkam ka aiñ Benami Act, neibhah wa i pynchah pyrtuid ktah ko ya ka Council kamjooh leh yei khih i khan ki jaitbru Pnar yong i hi.
Discussion about this post