Ka Meghalaya Pradesh Congress Committee ynne ka sngi da pynman ko ya ka Motorcycle Rally deiwa sdang na Eastern Air Command wa em ha Upper Shillong hadooh Bhoirymbong, Ri Bhoi District deiwa em da ki spah ngut kiwa kreh ka Party, kiwa kyrchaan wa ki bru paidbah kiwa da chimbynta deilang.
Ya kani ka Rally da pynman hajrong ka phang pyrdi kawa ong ‘Save Democracy’ yow pynyoo yei yakhih ka Congress wow pynneh pynsah ya ka synchaar paidbah namo ka Democracy kamjooh yei hok kam kiwa chong chnong ka India.
Kiwa yahkhmat ka Congress da pynbaad ki leh yei em i wym khooid hei pynman ya ka Special Intensive Revision (SIR) ki Electoral Roll deiwa ong wa em ka “Vote Chori”.
Kani ka Rally kawa jai jai da lai luti ko nadooh Eastern Air Command lyngba ka Umsyrphi, Mawlai Pump, Mawlai ISBT wa Lad Umroi chwa wow pynkut ha Bhoirymbong, Ri Bhoi District.
Ka Congress da ong ko wa kani ka Rally man ko kam chibynta wow pynsñiawthooh paidbah yow tip yeiwa da jia hapoh ka ri kamjooh chaphang i hok kiwa thap Vote.
Discussion about this post