Ka Amlarem Sub-Divisional Sports Association (ASSA) deiwa ya krehlang wa ka yung krehkaam ka Sub-Divisional Officer (Civil), Amlarem Sub-Division da sdang ko ya ka Amlarem Football League 2026–27 kawa da pynman ha ASSA Mini Stadium, Ladjaplem kawa man leh kam chibynta i lehkmen dap 50 snem ka Amlarem Sub-Division.
Ya kani ka lympung yalehbol da wan wow wai da u Lahkmen Rymbui, Montri sorkar kam u kongsan deiwa emlang ka Vevotolu Kezo, Sub-Divisional Officer (Civil), Amlarem Sub-Division kam ka symbood kongsan.
U Lahkmen da khana u wa neibynta ka Super Division kiwa yoh yei naam Champions daw yoh ki ₹1 lak wei kiwa yoh Runner-Up ₹60,000. Ha ka First Division won ki Champion daw yoh ki ₹60,000 katwa kiwa yoh Runner-Up u yoh ki ₹40,000. Ha ka Second Division kiwa jop yei naam Champion daw yoh ki ₹30,000 wei kiwa yoh Runner-Up daw yoh ki ₹20,000. Ha ka Third Division ki Champion daw yoh ki ₹25,000 katwa ki Runner-Up u yoh ki ₹15,000.
Da pyntip u leh wa neiliang ka sorkar da pynchna ko chiboon ki thaw yalehke wa kynthup ya kani ka madan wa thymme wa em ha Ladjaplem yow pynku ya ki kaam yalehke deiwa pyrkhat leh ya ka National Games ha u 2027 kawa daw man ha Meghalaya.
Ha kani ka Amlarem Football League 2026–27 da em 92 tylli ki Team ha ki soo tylli ki Division. Ha ka Third Division da em 36 tylli ki Team, ha ka Second Division da em 28 tylli, ha First Division 20 tylli katwa ha ka Super Division da em 8 tylli.
Ynne da sdang da ki yalehke ka Super Division heiwa ki Team wa em ha kani ka samoi toh ka Lumpyngngad Youth Club, ka Lamin XI SCC, ka Umladkhur Sports Club, ka Sohlawiat Social Cultural Club, ka Mani Bha C&SC Skhentalang, ka Amlarem Social Club, ka Jarain Cultural and Sports Club wa ka Youth Club Pdengkarong.
Ka yalehke wa da pynman ynne toh hapyrdi ka Lamin XI SCC wa ka Amlarem Social Club kawa da kut da 0-0.
Discussion about this post