Ka chnong Tuber Kmai Chnong kawa em hapoh East Jaiñtia Hills District hapoh i yahkhmat u Waheh Chnong, u Jiedlang Sana deilang uwa e buit ka chnong, u Wanthmu Phawa chirup wa ki dkhot yong ka chnong hi waroh kawi, da pynman yei lai kjat (Trekking) nadooh na chnong cha Iawmusiang, Jowai deiwa bood ya ki luti kjat ki warim wajah, ki beipun papun kam wow pynneh pynsah ya kani ka luti.
Ka chnong Tuber Kmai Chnong katkam wa man kattæ da yaleh ko u thooh ki laad ki luti yow chem tre ya ki nuksa wa bha kiwa leh ki waheh, ki warim wajah wei kammon wow pynneh pynsah ya ki dohum, dohwah, ki sim ki doh, ki khloo ki kjam kamjooh ki luti ki singkieñ khamtam ki luti lai kjat.
Da sdang ya ka Trekking deiwa e yei sneiñ i kroo na u waheh chnong kamjooh da pynap pynsñiaw ya ki kaam ki jaam i lai luti da uwa e buit ka chnong kamjooh da yoh leh i ngooh Blai wa kyrpang.
Hadien wa poi ha Jowai, neiliang ka Seiñraij Jowai da pdiang burom ko ya ki khon ka chnong Tuber Kmai Chnong ha yung krehkaam ka Seiñraij wa em ha Iongpiah, Jowai.
Heini da yoh ya ki kyntien pdiang burom na u General Secretary ka Seiñraij Jowai, u Arwotki Sumer deilang wa ki waheh yong ka Seiñraij wei da yoh leh ya ki kyntien ngooh Blai hachwa u yoh yei dih cha yonglang.
Ka chnong Tuber Kmai Chnong dap ko dei mynsien sñiawngooh ya ka Seiñraij Jowai kawa da pdiang burom ya ka shnong Tuber Kmai Chnong da ki kyntein sneiñ kyntien kyntu ya ki khon ka chnong kamjooh dei ngooh i dem ryngkat ka cha ka dud.
Neiliang ka Tuber Kmai Chnong da ong ko wa ka Iawmusiang toh ka yaaw kawa rim tam hapoh Jaiñtia Hills wei katkam waman kattæ da yoo ki wa kani ka yaaw da sdang ko u hiar ha waroh ki liang du neidaw wa da boon ware ki yaaw ki haat kiwa mih lakam wa mih ki seiñ boonjait.
Ka chnong Tuber Kmai Chnong kam ka dak u e bor e mynsien ya ka Seiñraij Jowai da pynman ko ya kani ka Trekking ynne ka sngi kamjooh booh ko leh yei kular u ya krehlang wa ki, da booh ko leh yei kyntu wei kyrpaad ya ki khon yong ka chnong wow sñiawbha ki u lai yaaw man ki sngi Iawmusiang kam ka dak i kyrchaanlang ya ka Iawmusiang.
Ki khon yong ka chnong Tuber Kmai Chnong hadien wa poi ha Iawmusiang da ya thied ki boon jait ki mar katkam wa kwah i mynsien ki wei manda kieh 2:30 da ya mihlang ki wow liwan cha chnong.
Discussion about this post