Ki bru ka State Disaster Response Force (SDRF), Meghalaya, ynne da ye ki wow sai yei metyap uwi u khynroo na ka wah Umtru ha Raja Bagan, Byrnihat hadien wa ngam um u ha ka 11 tarik uni u bnai.
Yeini wa jia da pyntip cha ki pulit ka Byrnihat Police Station ha ka 11 tarik heiwa ki bru ka 1st SDRF Battalion wa em ha Mawdiangdiang, Shillong da lai ki cha kani ka thaw heiwa dapoi ki ynne i step heipor 9:00 waje.
Ki bru ka SDRF da sdang ki wow thooh ya uwa ngam um deiwa pynemkaam da ki Rigid Inflatable Boat (RIB) deilang ki naar chieh yow khwe ya u bru tangwa ym em chem oo.
Kamtæ da pynemkaam da ki Scuba Divers kiwa da ngam chapoh um ha ki bynta wa da antaad wa ye u bru u em tangwa da chem yei metyap ha i bynta wa jngai kamwa 2 Km na i thaw wa jia.
Uni uwa yap da tip kam u Bishnu Gosh (19 snem) uwa chong chnong ka Raja Bagan, Byrnihat wei da e kti yei metyap cha ki pulit ka Byrnihat deiwa emlang kiwa ha-yung ha-sem uwa da khlaad noh.
Discussion about this post