Da ka hukum ka Jaintia Hills Autonomous District Council, ki bru yong ka Elaka Rymbai hapoh i pait u Merimon Rymbai (Vice Chairman ka Elaka) wa u Lincoln Nixon Dkhar (Secretary Elaka Rymbai) deiwa synraanlang ki dkhot kiwa kynthup ya u JR Pyrtuh, u Deibor Suchiang, u Nicholas Rymbai wa u Laskyboy Swer, ha ka 13 tarik uni u bnai da hiar ki cha ka chnong Bataw wow pynman yei jied ya u waheh chnong wa ya kiwi de kiwa kitkaam chnong kamjooh ki dkhot ka Executive Body yong ka chnong Bataw.
Yei jied da pynlai da u Merimon Rymbai heiwa da yoh yei pynche wa da kawi ka sur kiwa chong chnong ka Bataw da jied biang ki ya u Deihok Sumer kam u waheh chnong.
Da jied leh ya u Martin Lyngdoh kam u Assistant Waheh Chnong, u Nehlang Suchiang kam u Secretary, u Bhalang Suchiang kam u Assistant Secretary, u Seiborlang Rupsi kam u Finance Secretary wa u Macdonald Suchiang kam u Office Secretary.
ki Executive Member kynthup ki ya u Bilis Pyrtuh, u Dahun Pyrtuh, u Arwan Lakhi, u Hajarkhamkor Dome, u Ejoplang Suchen, u Teimon Palong, u Waster Sympli, u Niwanpoi Suchiang, u Willing Sumer, u Shewanki Sumer, u Jowel Lyngdoh, u Tamon Sumer, u Johnris Lyngdoh, u Mastu Nongwa, u Shemi Rupsi, u Sngewhame Sumer, u Rimiyoo Lamare, u Ampli Rupsi, u Omega Sumer wei neiliang ki kynthai da jied ya ka Pari Pajat, ka Magreshia Sumer, ka Hameda Suchiang wa Ka Arkini Suchen.
Yei kaam Auditor da jied ya u Teimon Syad wa u Dreamson Suchiang wei ya u Skem Sumer da jied kam u Chairman ka Dorbar Chnong.
Ka samoi krehkam kini waroh u neh ko le snem nadoh u 2026 hadooh u 2029.
U Deihok Sumer hawa e yei klam tbian da e u khublei u ya ki paidbah wa chong chnong kiwa da e ka laad dei maya wei chaniah yow man biang u kam u waheh chnong ka chnong Bataw deiwa booh ka thong u nang chakri bha chooh chooh neibynta u kynrong ya ka bha ka miat kamjooh ka roi ka paar hapoh ka chnong.
Discussion about this post