Ki Khristan toh u man ki kiwa khooid ym toh kiwa ar sap: Rev. Dr. M.J. Hynniewta

Jowai: Ka Khasi Jaiñtia Presbyterian Synod Mihngi kawa 15 wa pynman nadooh ka 16 tarik hadooh ynne ka 19 tarik da wan sakhi ya ka da ki para wa ngait niam na kylleiñ ka ri-loom Khasi wa Jaiñtia.

Ya kani ka Synod da pynman ha ka Balang Presbyterian Ummulong District, Wahiajer Moodymmai Presbytery.

Ka Matphang yong kani ka Synod toh “Wat shah ba yn shukor ya phi” (Gal. 6:7).

Ha ka yaseiñ pyrdi sngi wa da yoh u sakhi ynne ka sngi da sdang da ki rwai yaroh heiwa da yoh yei puræ sdang wa i ngooh Blai na u Rev. R.S. Nongkynrih.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Da em leh ki rwai na ki 4 tylli ki Choir wa kynthup ya ka Balang Presbyterian Jowai, ka Standing Choir ka KJP Synod Mihngi, Balang Presbyterian Laitumkhrah wa na ka Balang Ummulong.

Ya ka khubor ki ktien u Blai da yoh na u Rev. Dr. M.J. Hynniewta uwa klam na ka Chithi wa ar u Paul cha u Timothy, lynnong 3 dkhot 1-5.

Hei sdang u pastor yei klam yong oo da ong wa yieñ u ha kani ka sngi kam uwa pap uwa da yoh yei maap yei pynim pynthymme na u Blai.

Yeini da ong u wa neidaw katni boon ki Kristan wa em yei dur Kristan tangwa ym em i ngait ki yei bor u Blai. I dur toh wow pynyoo pyrthai donhi tangwa yei sikai wa da yah u Blai won ym em bood ya ki. Kamtæ ki bru wa kam toh ki ki Kristan toh u man ki ki bru wa kyrpang kiwa jubab yei khut u Blai ya ki, u man ki kiwa khooid kiwa pynyoo da ki kaam nadooh i hei rukom pyrkhat, i klam, i baam, i dih hadooh i rukom chong kurim.

Kamtæ ym toh u man ki Kristan wa ar sap neibhah kiwa kam wa ki toh ki Kristan toh u man ki u bru Blai neibhah katkam ka Chithi u Paul da ong u wa u Blai ym neh chah ya ki Kristan wa biej spah, kiwa thok, ki khon wa ym ngait sneiñ, kiwa ak khooid, ki wa len ya u Blai wa kiwi kiwi.

Ha kani ka Synod leh ynnin ha ka yaseiñ wa pyllai da u Moderator Rev. R .H. Lyngkhoi. U Rev C. L. Laloo, da pyntipmit u ya ki 9 ngut ki pro-pastor kiwa u chah pynkyntang, ki tæ toh u 1.Pro. Pastor Early Morning Ch. Passah na Mowkaiaw Presbytery, 2. U Pro Pastor Hamdison Lyngdoh Giri na War Jaiñtia Presbytery, 3. U Pro Pastor R. Bakynsai Swer na Shangpung Presbytery, 4. U Pro Pastor Rieweh Kupar Sutng na Sutnga Presbytery, 5. U Pro Pastor Iaithmuskhem Lyngdoh na Laitumkhrah Presbytery, 6. U Pro Pastor Datne Sbak Lyngdoh-Field Secretary (MED), 7. U Pro Pastor Baniaraplang Khar-ir- Field Secretary (MED), 8. U Pro Pastor Bashanbor Saiborne- Field Secretary (MED) wa 9. U Pro Pastor Pynshaibha Warjri- Field Secretary (MED)

Ha chwa u pynkyntang, u Rev. H.S. Dan won da booh u i kylli chem mynsien ya kini ki 9 ngut. Yei pynkyntang da leh da u Rev. R.H.Lyngkhoi. Neitæ pynbood won i e kti kyrkhu na waroh ki Ex-Moderator ka KJP Synod Mihngi.

U Rev R.H. Lyngkhoi toh u moderator thymme, u Rev C. L. laloo toh u Secretary thymme ka Synod.