Kam chibynta u pynku yei kaam uiñke suwari hapoh Ri-loom Jaiñtia wei wow pynbna naam leh ya kiwi won ki thaw uiñke wa dang em chooh nadooh ki kchaaid ki krem, ki loom ki wah wa yoosuk, neiliang ka Jaiñtia Tourism and Environment Society (JTES), ynne ka sngi da pynman ko ya ka Photography Exhibition ha Thlumuwi kawa em harood u sarok Jowai-Dawki.
Ha kani ka Exhibition da pynyoo rong ya ki dur waphær waphær wa da chon da ki bru wa sñiawsuk yei kaam chondur, kamjooh leh i pynyoo rong ya ki dur wa da chon da ki 22 ngut kiwa chimbynta ha i yakob chondur wa khut pynman da ka Jaiñtia Tourism and Environment Society hajrong ka phang ‘The Waterfalls of Jaintia Hills’.
Ha kani ka Exhibition da wan emlang nadooh kiwa puræ ka Kiang Nangbah Govt College Jowai, ka Jaiñtia Eastern College Khliehriat wa kiwi.
Ha ka yalang wa pynlai da u M.S. Lhuid, Programme Coordinator uwa man leh uwi na ki dkhot wa sdang ya ka JTES, neiliang u Secretary ka JTES, u R. Lamar hawa e yei klam ong u wa i man i kiwa embhah tam wow yoh ya ki thaw uiñke suwari wa yoosuk dei kyrkhu kyrpang ka rymaw, ymtoh kam cha kiwi ki thaw wa hap pynlut da ka poisa neibynta u chna ki thaw uiñke suwari.
Kamtæ kyntu u wow yada pynneh pynsah yei man kyrpang ki thaw uiñke suwari, u lehkhooid ya ki neibhah kani toh kawi na ki laad kamai ki paidbah yow im-ja.
“Kamwa hei pyrtuid kani ka seiñ da kynthuplang yei kyntien Tourism wa Environment, iwa mut lym ye u yada ya ka rymaw ym yoh ya ki thaw uiñke, wei yei yakob chondur leh da pynman deiwa em yatoh wa ka mariang,” da ong u R. Lamar.
Neiliang u Hercules Toi, Principal ka Kiang Nangbah Govt College Jowai hawa klam ong u hei puræ puthi ymtoh u pynlai yumut du ha ki Subject wa puræ tangwa toh u chimbynta leh ha kiwon kiwon ki rynsan wa yoh kabu najrong wow pynpliah yei sap wa em.
“Ka rymaw toh kawa da e kyrpang da u Blai, iwa emkaam sa du wow pynphooh pynphieñ u sumaar wei pynbna naam ya ki thaw wa yoosuk kiwa man ki thaw uiñke suwari,” da pynrap u H.Toi.
Kiwi won wa e i klam kynthup ya u Leeno Shylla, u Ruhi Phawa wa kiwi.
Ha kani ka sngi najrong i chimbynta ki khynroo khyllood puræ hei yakob Quiz, da saam leh ya ki khusnaam cha kiwa jop hei yakob chondur, heiwa da yoh nyngkong deilang ka song poisa wa Rs. 10000 da u Dapmon Syngkor uwa na ka chnong Syndai, West Jaiñtia Hills, hei wa ar deilang ka song poisa wa Rs. 8000 da jop u Kyrshanbor Pala uwa na Lawjynriew, Shillong katwa hei wa le won deilang ka song poisa wa Rs. 6000 da jop da u Dr. Lawiki E Shullai uwa na Salaroh, Jowai.
Discussion about this post