Ka yalang kawa da khut pynman da ka chnat Tourism ka sorkar jylla yow pynap pynsñiaw yow tip deiwa janai chaphang i thmu wow chna ya ka Shillong Ropeway Project kawa da pynman ynne i janmiet ha State Convention Centre, Shillong, da man ko kawa da chit da thnam bha heiwa da mih i yatainia wa joor bha hapyrdi ki dkhot ka Joint Action Committee (JAC) wa kiwa yahkhmat ka Riat Laban Dorbar, hadooh wa pynman ya ki dkhot ka JAC wow mih syndet na ka yalang.
Neiliang ka JAC da dawa ko wa neiliang ka Riat Laban Dorbar Pyllun toh u chim ko yei kitkhlieh deiwa khut pynman biang yei pynsñiaw paidbah.
Ini i dawa na ki dkhot ka JAC toh hajrong ka yurim wa ki dadep ki wow ong ha ki por wa dadep wa kiwa boon na ki paidbah wa chong chnong yong ki 7 tylli ki dorbar shnong ka Riat Laban Dorbar Pyllun ym em tip ki chaphang ka pynsñiaw paidbah næ ka Public Hearing.
Kawa yahkhmat ka Joint Action Committee (JAC), ka Venetia Pearl Mawlong da ong ko wym em kawon kawon ka Public Hearing ha u snem 2022 wei iyi iyi iwa ong kiwa yahkhmat chnong toh iwa thok.
Da ong ko wa ha waroh 7 tylli ki dorbar chnong ym em i pynbna wa em ka Public Hearing ha u snem 2022, wei da pynrap ko wym ye u ong wa mylliñ ya iwa dadep kamwa da ong u Secretary ka Riat Laban Dorbar, neibhah wa katkam wa mih ha ki laad pathai khubor ya ka poisa dadep su cha ki wei kayi wa em cha kylla du ki waheh chnong wa tip katwa kiwa chong chnong ym tip ki iyi iyi.
Da ban joor ko wa ka JAC la kammon kammon ym pdiang ko ya ka Ropeway ha u Lum Shyllong wei toh u rah ka cha kawi won ka thaw.
Discussion about this post