Ka sorkar jylla lyngba ka chnat Tourism da pynche ko wa u Lum Shyllong næ u loom wa kyntang ym chah ktah u iyi iyi na ka Shillong Ropeway Project neibhah wa jngai u kamwa 3.5 Km haroh na ka thaw wa da thmu wow booh ya ka Ropeway.
Ka Commissioner & Secretary yong ka chnat Tourism, ka Rosette M Kurbah da ong ko wa ka Project toh na Shillong View Point wei ym ktah ko ya ki wah dooid næ ki tyllong um kiwa em ha katai ka thaaiñ neibhah ka Project jngai ko na ki tyllong um.
Da ong ko wa ka sorkar da wanrah ko ya kani ka Project kam wow e laad ya kiwa uiñke suwari wow lai da kawi won ka luti cha Shillong Peak wei da pynbiang leh ki kyndon wa rkhiñ najrong wa da pyrkhat leh ya kiwa pynlai ya ka View Point wa kiwa dai ya ki mar ki mata ha katai ka thaw.
Neiliang kani ka heh sorkar da ong ko wa ka chnat smat ko wow pdiang yeiwa e yumut wei ym em i leh murieh. Wei da ong ko leh wa ka chnat daw chong pyrkhat biang ko hajrong i dawa ka Joint Action Committee (JAC) yow pynman biang yei phyllu hajrong kani ka Shillong Ropeway Project.
Kani ka Project toh kawa chongdor Rs. 151 klur, wei ka Ropeway toh kawa jrong 913 meter kawa em 6 tylli ki Tower ki wow kdoh ya ka Ropeway kawa daw lai najrong ki dieñ wei daw hap wow ah dieñ du neibynta wa em u Tower-6.
Discussion about this post