Ynne ka sngi ka NPP Jowai Constituency da pynman ko ya ka yalang paidbah neibynta u kyrtong MP ka Party cha Lok Sabha u Dr. RL Nonglait ha Madan Wahriong, Mihmyntdu.
Ha ka yalang da emlang u Dy Chief Minister, u Sniawbhalang Dhar deilang u Health Minister, u Wailadmiki Shylla, u MLA ka Raliang u Comingone Ymbon, ka MLA ka Sutnga Saipung ka Santa Mary Shylla,ki MDC ka JHADC wa kiwi kiwi.
U Wailadmiki hawa e i klam ha ka yalang da ong u wa u Dr. Nonglait toh uwa da em i puræ puthi iwa da biang wei kamjooh leh uwa da em ha ki kaam imlang sahlang.
Da ong u wa ynne ka sngi da pynyoo ya ki kaam wa da leh ka sorkar wei iwa da leh u kam u MLA yeiwa da pynyoo yeini lyngba i Video ha kani ka yalang.
Da e u ha ki paidbah wow bichaar ya ki kaam neibhah wa em ki lok wa beiñ wa ong wa ka sorkar ym u leh ko iwon iwon tangwa ki kreh waroh wa da yoo ha kylleiñ ka Constituency toh iwa da wanrah da ka sorkar wa yahkhmat u Conrad Sangma kam u Chief Minister.
U Wailadmiki da ong u wa em bru kiwa kwah u rem noh u MLA ka Nartiang wa u MLA ka Jowai neibhah wa kat iwa emkaam ki paidbah da ye u e bait ya ki.
Chooh chooh da ong u wa nachwa du kam u MLA leh da boon wa yoh na ka sorkar wei katni pathan kam u Minister daw yoo chooh chiboon ki kaam wow wan deiwa ong wa lada rem ha kani ka MP Election kammon u nehswe wow lai paan yarap chooh na ka sorkar.
Da ong u wa kani ka kynti wa dadep jied ya u MP na kawi ka Party uwa yieñ samen khlem kyrchaan ya ka sorkar wei khlem kyrchaan ya ka Liang Pyrchah tæ hawa yieñ hapyrdi kammon u ye u pynsñiaw cha ka sorkar.
Heijooh i por da ong u wa ka NPP toh ka Regional Party kawa da tipmit kam ka National Party deiwa pynche wa i ong wym em Pary Ri-loom toh iwa bakla neibhah ka NPP toh kawa da seiñ na Meghalaya wei ki bru na kiwi ki thaaiñ mihsngi wan ki cha Meghalaya wow yachem wa ki heh ka Party hapoh ka jylla.
Da kyrpaad u ya kiwa kyrchaan ya ka Party wow jied pynjop ya u kyrtong ka NPP, u Dr. Nonglait kam u MP ha ka Election chiteiñ samoi wow wan.
Discussion about this post