Ka Cyclone Arnab dang joor ko kat dang lai ki kynta hajrong ka Bay of Bengal ynne ka sngi heiwa ki sorkar ka Andhra Pradesh wa Odisha da pynkhreh bha ki neidaw wa daw hiar khyndaw ko mynstep ka 28 tarik heiwa da phah khang ya ki skur, ki thaw wa synjor, ki rel wa kiwi.
Ka India Meteorological Department da khana chwa (Forecast) ko wa ka Cyclone Arnab u poi ko ha Andhra Pradesh wa Odisha hapyrdi ka Bapatla wa Visakhapatnam, heipor chiteiñ sngi ka 28 tarik heiwa ka la’ær u beh ko hadooh 115-125 kmph.
Ka South Coast Railway da pyndam ko ya ki 53 tylli ki rel ha ka 27 tarik wa khamtam kiwa lai na Vijayawada, Rajahmundry, Machilipatnam, Narasapur, Bhimavaram, Kakinada Port, Guntur wa Visakhapatnam.
Ka chnat Railway da kyntu ko ya ki paidbah wow pait ya ki Status ki rel chwa wow mih ki na yung.
Neiliang ka sorkar Andhra Pradesh da phah mih ko ya ki bru na ki thaw wa man thor wei u Chief Minister, u N Chandrababu Naidu da booddien u yei man i long langær wa ki sahep sorkar.
Hadooh ynnin i miet ka 26 tarik da kyrriah ya kamwa 50,000 ngut ki bru cha ki thaw wa chngaaiñ heiwa 4 lak ngut ye ki u chah kyrriah hadooh myntu i miet.
Ka sorkar da pynlait ko leh Rs. 27 klur i yarap cha ki 20 District wow pynkhreh ya ki tiar wa emkaam nadooh i baam, ka um, ki dawai wa ki thaw rieh wa skem.
Discussion about this post