Ka sorkar pyrdi da e bor ko ya ka Lokpriya Gopinath Bordoloi International (LGBI) Airport ha Guwahati wow chalan ya u dieñ Agarwood wa i phñiang Agarwood Oil, kam chibynta wow pynyaar ya i khayi Agarwood ha Assam.
Ya ini da pynbna da u Union Commerce and Industry Minister, u Piyush Goyal ynne ka sngi katkam i kyrpaad u Chief Minister, u Himanta Biswa Sarma.
Da ong u wa ini daw yarap bha i ya ka Assam wa ka a Northeast, heiwa daw pynduna ya ki moochynthut, ka bai kit wa ka bai pynmih phñiang na uni u dieñ.
Ini wan i hadien wa u Himanta da kaweh lama u wow chalan ya 123 Kg u dieñ Agarwood na Golaghat District cha Dubai ha ka 26 tarik u October lyngba ka One District One Product (ODOP) ka sorkar pyrdi.
Ka Assam toh kawi na ki jylla wa rep ya u Agarwood ha India, heiwa da rep bha ya oo ha Golaghat, Jorhat wa Sivasagar District.
Ka sorkar da wanrah ko leh ya ka Assam Agarwood Promotion Policy, 2020 wow pynheh ya ka yaaw wow rep ya uni u jait dieñ.
Katkam wa man katni da em 50,000 ngut ki bru wa rep ya uni u dieñ ha Assam.
Discussion about this post