Ki pulit ka Delhi ynne ka sngi da yalang ki hakhmat ka Police Headquarters wow pyrchah yei kyrriah kreh ya u Assistant Commissioner of Police (ACP), u Manasvi Vashistha wa u Shahdara Station House Officer (SHO), u Inspector Arun Kumar, deiwa dawa wow thung biang ya ki ha ka jooh ka thanat.
Ha ini i yakhih dapoi 100 ngut ki pulit chynrang wa kynthai kiwa da ksoh ya ki Placard wa ki Poster.
Ya ka hukum kyrriah kreh da pynmih ha ka 28 tarik u October 2026 hadien wa mih i yachoh ha Shahdara Police Station ha ka 23 tarik u October heiwa da mynsoo uwi u Lawyer iwa pynman ya ki Lawyer ka District Court wow pynman yei chah thngan.
Ki Lawyer da yoh ki yei kular wow kem ya kiwa pynmynsoo ya u Lawyer wei da pynlait ya kiwa chah kem khlem pynchitom heiwa da pynbaad ki leh wa em ki sahep pulit kiwa da pynyang Pistol ya ki.
Ya u Vashistha da kyrriah kam u Sub-Divisional Police Officer (SDPO) ka Gandhi Nagar ha Shahdara Subdivision cha ka Special Police Unit for Women and Children (SPUWAC), katwa ya u Kumar na Shahdara Police Station cha Delhi Police Security Branch wei ki Lawyer da pyndam ki yei yakhih hadien wa mih ka hukum kyrriah kreh.
Ki pulit da yalang ki ynne ha Headquarter nadooh 8:00 waje i step deiwa kwah u yachem wa u Police Commissioner wei wow pynsñiaw yei sñiawkhia yong ki.
Neiliang ki heh pulit wa kynthup ya u New Delhi DCP, u Sachin Sharma, da yaklam u wa ki pulit wa yakhih deiwa kular wow psiah chapoh wow klam wa u Police Commissioner hapoh Headquarters bar u pynman yakhih.
Hadien kattu katni por u Delhi Police Commissioner, u Anurag Kumar wa kiwi ki sahep Special Commissioner da khut ki ya kiwa yakhih cha i yaklam Sampark Sabha hapoh PHQ Auditorium.
Discussion about this post