Nyngkong chwa ha Shillong poi ka JPC yow yaklam hajrong ka FCRA, da e por 15 sngi ya ki Balang wow pynche ki

Ka Joint Parliamentary Committee (JPC) kawa da thung heiyatoh wa ka Foreign Contribution (Regulation) Amendment Bill, 2026, da wan poi ko ha Shillong yow ap yei pynsñiaw na ki kynhun niam wa Balang khamtam ki Balang Christan hajrong i pynkylla ya kani ka aiñ kawa da wanrah ha u snem 2010.

U Chairman ka JPC, u Sanjay Jaiswal da ong u wa kani toh ka yalang wa nyngkong yong ka JPC cha baar na Delhi, wei da wan chwa cha Shillong toh hadien wa u Montri Rangbah ka Meghalaya, u Conrad K Sangma da khut khnang u yow ap chwa yei pynsñiaw na kiwa yahkhmat niam yong kani ka jylla.

Related posts

Pynman yakhih ki pulit ka Delhi hakhmat ka Police Headquarters

November 2, 2026

Da khang ya ki skur wei da pyndam ya ki lieñsuiñ neidaw ka Cyclone Murasu

November 2, 2026

U Jaiswal da ong u wa ka Committee da chim wei da ap ko ya waroh iwa da pynsñiaw da ong ha ka da kiwa napoh ka jylla hajrong ka FCRA wei da paan pynche chooh chooh leh na ki wow jubab ki hapoh 15 sngi, wei hadien wa yoh yei jubab ka JPC daw phah ko yeini waroh cha ka sorkar hachwa wow mynjur ya ka Bill kawa pynmyntoilang ya waroh.

Ha kani ka yalang wa ka JAC ha Shillong, da em palat 30 tylli ki kynhun kiwa da lai chimbynta wow pynap pynsñiaw wa kynthup na kiwi ki jylla ka Northeast ka ri, wei na Meghalaya da mihkhmat ya ka Balang Catholic da u Fr. Richard Majaw, ka Balang Presbyterian da u Rev. Pastor HL Marshing (PCI) wa u Dr. DRL Nonglait, ya ka Church of God da u Rev. SK Syiemlieh wa na ka Balang Baptist da u Tony Marak.