U Montri Rangbah ka jylla, u Conrad K Sangma hawa klam heiyatoh wa i mih i pyrchah yei pynchna ya ka Shillong Ropeway, da ong u wa neiliang ka chnat sorkar dadep ko wow pynche ha waroh ki liang wei oo kwah u wow yaklam lada em iwon iwon wa sñiawkhia kiwa pynman yakhih tangwa heijooh i por da ong u wa u pyrchah du neidaw wa kwah u pyrchah ya ka sorkar ymtoh iwa miat.
Da ong u leh wa lada em sakhiat i eh wa sñiawkhia toh iwa ye u yaklam neibhah ka sorkar kattu da pynlut ko kamwa ar snem tam neibynta kani ka Ropeway wei waroh ki Agency wa da emkti toh ki Expert kiwa da pait lut ya waroh wei kiwa da pynche leh heiwa da em leh kiwa da hun yei pynche.
Da pynkynmoo u leh wa neipor cheipor da jooh yaklam yei duna kreh, kamtæ da wanrah da kani ka Ropeway yow pynku ya ki kaam Tourism cha ka kyrdan wa thymme wei ki laad ki kabu wow mih na kani toh kiwa heh bha heiwa daw em da ki spah lada ymtoh da ki hajar ngut ki khynroo kiwa daw yoh kreh.
Kamtæ lada pyrchah yeini man ko leh kam wow pyrchah ya kitu kiwa daw yoh kreh na kani ka Ropeway.
Da ban joor u leh wym em i wow chah ktah ka rymaw wei ka sorkar kwah ko wow lai chakhmat neibynta i yoh myntoi ki khynroo khyllood.
Da phylla u leh wa ileh hadien ar snem chiteiñ mih i pyrchah manda su sdang i kreh wei iwa emkaam toh wow ya pynbait ya iwon iwon iwa sñiawkhia wei ka sorkar smat ko wow leh yeini yow ye noh u lai chakhmat.
Discussion about this post