Ka Kur Bamon, Suja, Phalangki (Jowai-Mihmyntdu) ha ka 7 tarik uni u bnai da lehkmen ko yei dap 25 snem (Silver Jubilee) i lai luti ha ka yalang wa da pynman ha ha District Library Auditorium, Mynthong, Jowai.
Ha kani ka sngi neiliang u Wailadmiki Shylla uwa man kam u Montri sorkar da wan u wow embynta kam u kongsan deiwa emlang kiwa yahkhmat ka kur Bamon, Suja wa Phalangki wei kam wow sah kynmoo da yoh leh wow pynlait paidbah ya ka Souvenir da u kongsan.
Da pynphooh pynphieñ chooh chooh ya kani ka sngi da ki rwai, ki chaad tynre, i saam ya ki Mementos cha kiwa seiñ ya ka kur wei da em leh i ah Cake.
Ya ki ktien pdiang sñiawbha da yoh na u W.M. Bamon, Chairman Jubilee, katwa ya ki kyntien e khublei da yoh na u Sankiroi Bamon, Secretary Silver Jubilee BSP (Jowai-Mihmyntdu).
Neiliang u President ka BSP West Jaiñtia Hills, u T.S. Bamon da pynsñiaw u chaphang ka History wa tbian yong ka kur heiwa da pynkynmoo u wa da seiñ ya ka kur Bamon, Suja, Phalangki ha u snem 2001 wei da jied ya u S. Omega Bamon kam u Chairman wa nyngkong wa ya u Titos Bamon kam u Secretary wa nyngkong ha utai u snem.
Kiwi de kiwa e yei klam wei kitbok kitrwiang ya ka kur ha kani ka sngi kynthup ki ya u Hopeful Bamon, u E.C.B Bamon wa u Pherbak Bamon.
Discussion about this post