U Montri Rangbah ka jylla, u Conrad K. Sangma ynnin da wai u ya chiboon ki kaam pynroi wa em ha Chokpot, SGH wa kynthup ya ka Block Office wa thymme, ka Farmers Market, ka PRIME Hub wa ar tylli ki yingkieñ heiwa da kular u leh wow pynbiang kiwa kreh ha ki thaw sumaar ka thaaiñ.
Ka Integrated Block Office Complex ka Chokpot Community and Rural Development (C&RD) Block toh kawa da chna hei lut wa ₹2.77 klur kawa chakri ya kamwa 55,000 ngut ki bru.
Ka Chokpot Farmers Market toh kawa chna hei lut wa ₹9.26 klur kawa em hapoh ka Department of Agriculture and Farmers Welfare wei deiwa em kani da yooluti wow yoh myntoi palat 3,000 ngut kiwa rep.
Kani ka yaaw kiwa rep toh kawa le mala kawa chna hei thaw wa heh 9,474 square feet wei em ko 60 tylli ki dukan. Em ko leh ya ka 9,276-square-foot Conference & Multipurpose Hall kawa chniam 700 ngut ki bru.
Ki mar wa wan dai ha kani ka yaaw daw yarap leh u pynlai yaaw ki chawi won ki yaaw lyngba ka Meghalaya State Organic Mission (MSOM), Mission Organic Value Chain Development for North Eastern Region (MOVCDNER) wa ka Mission for Integrated Development of Horticulture (MIDH). Daw yarap leh wow dai ya ki mar lyngba ki Farmer Producer Organisations (FPOs) wa ki Farmer Producer Companies (FPCs).
Ka Chokpot Warima PRIME Hub won toh kawa da chna hei lut wa ₹6.32 klur hapoh ka MeghaLAMP/IFAD Project kawa daw yarap ya ki kaam kiwa yatoh wa ki mar wa pynmih na ki chken ki siej, u kwai wei daw man ko leh kam ka thaw yow e Training yow pynlai yaaw ya ki mar.
Kani ka thaw toh kawa daw pynmyntoi ko ya 3,570 ngut kiwa rep wei daw pynlut leh sa ₹62,19,215 yow pynheh ya kani ka thaw.
Discussion about this post