Ynne ka sngi da pynman ya ka yalap Election u Vincent H Pala neibynta ka Election MP chiteiñ samoi ha Sutnga heiwa u Emlang Laloo, President ka Nartiang Block Congress Committee da ong u wa hadooh ynne ka Congress da dap ko 151 snem heiwa da khana u ya ka parom wa sdang ya ka hadooh wow laitlooid ka ri India.
Da ong u wa ka thong ka Congress toh wow pait ya kiwa duna hei yoh i laa, wym hoi u pynphær ya ki jait niam wei ha kini ki sngi ka Congress wa pyrchah ya ki aiñ kiwa man pyrchah ya ki khian paaid.
U Emlang da kdaw u yei yakhih ha kini ki sngi nadooh ki Lawyer, kiwa puræ, ki Doctor wa kiwi neibhah wym hun ya ka sorkar BJP wei du ka Congress wa yieñ pyrchah ya ka wow yada ya waroh khlem em i chah chiliang la ki khroo jait næ khian jait.
Da khana u ya i yarap wa e ka Congress ya ka jylla neibynta kiwa duna hei yoh i laa, kiwa rep wei heipor wa dang man sahep u ha Jowai dapoi ka Scheme na ka sorkar pyrdi kawa yatoh wa ka Water Shed heiwa da chna ya ka DPR wei da lai ha waroh ki chnong wow yoh myntoi hawa u Vincent dang man u kam u MP.
Da kdaw u ya ki kaam pynroi wa myntoi kiwa rep nadooh ki Band um dang heipor wa synchaar ka Congress ha kylleiñ nadooh na Leteiñ, cha thaaiñ Saipung wa kiwi heiwa wot ki kor soor leh da yoh wow e cha ki paidbah ha kylleiñ ka East Jaiñtia.
U Emlang da khana u wa heipor wa man sahep u, na Jowai u MLA toh u Dr. RC Laloo wei ha Delhi won u MP toh u Vincent Pala heiwa da suk bha wow wanrah ya ki kaam pynroi.
Chooh chooh da ong u wa katni ym em Scheme de na ka sorkar pyrdi neibynta kiwa duna hei yoh i laa deiwa kyntu ya ki paidbah wow kyrchaan ya u Vincent Pala ha kani ka Election khnang wow ye u wow wanrah ya ki Scheme pynroi wa boonjait.
Discussion about this post