Ka seiñ Congress ynne ka sngi da pynman ko ya ka yalap Election neibynta u kyrtong yong ka, u Vincent H Pala ha Sutnga, East Jaiñtia Hills hei emlang u MP warim ka jylla cha Rajya Sabha, u Dr. WR Kharlukhi wa kiwi kiwi de.
Ha ka yalang wa pynlai da u President ka DCC East Jaiñtia Hills, u Michael Nongtdu, da yoh i kyntien pdiang burom na u President ka Sutnga Block Congress Committee, u Victor Suja.
Ha ka yalang da yoh i klam na u Pilson Lamurong uwa man u Asst. Waheh Chnong ka Moolait Bri Sumer uwa da ong wa hawa jied ya kiwa mihkhmat næ ka Party toh u man kiwa stat wow jied khnang wow ye u jied da u bru wa ye u wanrah ya i chongsuk ha ka imlang sahlang.
Da ong u wa em ki bru wa ong wa katwa em ka Party leh hoi hi næ em won kiwa ong wow lai cha kiwa e poisa heiwa ini man iwa bakla bha deiwa kyntu ya ki paidbah wow khana pateiñ cha kiwi wow jied ya ka Congress ha kani ka kynti khnang wa ha u 2028 ka Congress daw ye biang ko wow chna sorkar neibynta wow kreh ya i bha i miat ka ri wa ka jaitbru.
Kamtæ da kyrpaad u ya ki paidbah wow kyrchaan ya u Vincent Pala wow man kam u MP.
U F. Ngamlai na Saipung da ong u wa ha Delhi da pynman ya ka yakhih hapoh i yahkhmat ka Congress ya kawa da kyrchaan da kiwa boon ki Party neibhah wa da sih ware i synchaar ha ka ri wei da emkaam noh u pynkylla yeitæ deiwa kyrchaan ya ka Congress ha kani ka kynti heiwa ki paidbah ka Saipung leh daw kyrchaan ki ya ka.
U Embok Pajuh na Nongkglieh Circle da kyntu u wow man kiwa yatylli neibhah kam uwa na Nongkhlieh leh yatylli ki wow jied ya u Vincent Pala neibhah wym jooh ieh ki ya ka Congress.
Ka S. Shylla kawa man ka District President ka Mahila Congress da ong ko wa kam ka seiñ manbei da kreh ki wow wanrah yei yatylli wow pynneh yei khlan ka Party kam ha ki por wa nachwa deiwa kyntu ya ki ar Constituency ka East Jaiñtia wow yatylli wow kyrriah yei eh i khor wa chem ha ka imlang sahlang.
U Phris Kympad na ka Sutnga Circle da ong u wa kani ka Election man ko kawa kyrpang neibhah u MP u yoh u wow kreh sa kamwa ar snem kamtæ emkaam u jied ya u Vincent H Pala neibhah wa man u bru uwa da chemphang ha ki kaam synchaar heiwa da man u nachwa kam u MP la 15 snem deiwa wanrah u chiboon ki kaam pynroi.
Da ong u wa u Vincent heipor wa man u kam u MP da e u salonsar u ya ki kaam pynroi nadooh ki chnong ki thaw, ki Raij, ki Elaka, ki Hima kamjooh leh ki Balang wa ki niam waphær waphær deiwa ong wa ki kyrtong ka NPP wa VPP toh kiwa thymme kamtæ emkaam u jied biang ya u Vincent Pala ha kani ka kynti sa chisien.
Chooh chooh da ong u wa da khang ya u mooyong la 12 snem heiwa da kyruiñ u cha i kular u CM Conrad Sangma uwa da ong wa hapoh 6 bnai daw ye biang u pynlait ya u mooyong tangwa hadooh katni dang man iwa sahteiñ tangwa u Vincent Pala da man u bru wa chynna jngai ha ini i kaam.
Da kdaw u wa nadooh wa khang ya u mooyong da boon ki bru wa wanrah biang ya ki khon cha chnong nei lai puræ cha baar neidaw wym dap de u su ya ki.
Heijooh i por da ong u wa ha kani ka sorkar NPP kiwa boon da man kiwa chem chitom bha neibhah wa wot da ki Contractor leh da hap ki wow chna seiñ wow dawa wow su ya ka Bill yong ki neibynta ki kreh wa dadep ki.
U Phris da ong u wa nachwa jooh em u wa ka NPP tangwa katni da em u wa ka Congress, kamtæ da kyrpaad u ya ki paidbah wow jied ya u Vincent uwa da ih uwa da chemphang bar ya kiwi ki kyrtong MP kiwi ki Party.
U Dakiha-o Nongtdu, u President ka Youth DCC East Jaiñtia Hills da ong u wa ki khynroo mih ki na ka jylla toh neidaw wa ka jylla ymye ko wow pyndap u pynbiang yeiwa emkaam ki.
Da kdaw u wa boon ki skur sorkar wa ki thaw puræ sorkar ha thaw palatsor man kiwa duna heiwa em du uwi uwa sikai neibynta ki spah ngut ki khynnah wei toh nei tlot kani ka sorkar.
Chooh chooh da ong u wa du chisngi wow rai i yeiyi u jied kamtæ da kyntu u ya ki khynroo wow jied ya u Vincent Pala ha kani ka Election neibynta ka mynried kawa phooh wa phieñ neibhah wa man u u bru uwa maya ya ka jaitbru.
Kiwi kiwa da klam kynthup ki ya u Henry Lamurong, President ka Congress na 6 Khliehriat wa kiwi.
Discussion about this post