U Chief Minister ka jylla, u Conrad K Sangma, ynne da e kti u ya ki chithi thung kreh namo ki Appointment Letter cha ki Government College Teachers ha ka yalang ha State Convention Centre Shillong hei emlang u Education Minister, Lahkmen Rymbui wa kiwi.
U Conrad da e khublei u ya kini ki 213 ngut ki wow man kam ki Assistant Professor wa ki Lecturer kiwow sikai ha ki Government College ha kylleiñ ka jylla deiwa ong wa ini toh i por wow wanrah ya i miat ha i puræ puthi ka jylla ha ki snem wow wan deiwa ong wa kiwa sikai toh u budloom yong ki thaw puræ.
Da ong u wa lyngba ini i thung kreh ka sorkar ym du pyndap ko ya ki kreh wa lait tangwa pynwandur ko leh ya ki thaw puræ khnang wa ki khynroo u myntoi ki na ki thaw puræ neibynta ka mynried wa tyrchaaiñ yong ki.
Da kyntu u ya ki 213 ngut wow pynwandur ya ka mynried ki khynroo ka Meghalaya dei yooluti wow pyndep pura ki yei kaamram yong ki.
I thung kreh Assistant Professor wa Lecturer ha ki Subject waphær ha ki Government College toh wa pynman da ka Meghalaya Education Recruitment Board (MERB) heiwa da em 3,185 ngut wa yaleh kreh wei da chah jied 213 ngut deiwa bood ya ki kyndon katkam wa da booh da ka UGC heiwa da pyndep won da ka Personal Interview yeiwa da pynman deiwa khooid.
Ya kini ki 213 ngut u phah cha Kiang Nangbah Government College, Jowai; Tura Government College; Sohra Government College; Williamnagar Government College wa Capt. Williamson Sangma Memorial Government College, Baghmara.
Ka Science wa Commerce Stream leh u sdang ha Sohra Government College, Williamnagar Government College wa Capt. Williamson Sangma Memorial Government College, Baghmara, chirup wa ka Arts wa Commerce ha College of Teacher Education, Rongkhon.
Kini kiwa sikai thymme daw lai ki leh cha ka P.A. Sangma Model Degree College, Rongjeng; Patharkhmah Model Degree College, Patharkhmah; College of Science and Commerce, Mawphlang wa ka College of Science and Commerce, Mahendraganj.
Discussion about this post