Ka DC Park kawa em ha Mynthong, Jowai man ko kawi na ki thaw kawa da chah iehteiñ wei kawa da chah ujor leh wa man ko ka thaw wa pynemkaam bakla ki bru wa dih kiad wei drugs.
Kamtæ u MLA ka Jowai uwa man leh u Minister ka sorkar jylla, u Wailadmiki Shylla ynne ka sngi chirup wa u Deputy Commissioner ka West Jaiñtia Hills, u Abhinav Kumar Singh wa kiwi ki sahep na ka chnat Urban Affairs wa kiwi da lai pait lai sylli ki ya ini i thaw wow pynkylla dur ya ka.
U Wailad da ong u wa nadooh nachwa da thrang u wow leh iwon iwon ya kani ka DC Park heiwa heipor u DC warim, u Tining Dkhar da chna pynmiat u ya ka wei hadien ini da sahkut ko khlem wa pynemkaam kamtæ u pynkylla noh ya ini i thaw.
Da khana u wa deiwa pynkylla ya ka ki khynroo khyllood u ye ki wow chna ya ki dukan namo deiwa booh da ki Fast Food Trucks ya ki khynroo wow yoh khih ki kamjooh wow chna ya ki thaw baam namo ki Dining Area.
Heijooh i por da ong u wa lyngba ka Meghalaya Grassroot Music Programme wei kamwa man cha kiwi ki thaw daw ye u wanrah ya kiwa tem wow wan rwai wan pynwyrngia heini man i janmiet.
Ha ini i thaw kiwa chong chnong ye ki wow wan u pynlut por wow baam, wow ap ya kiwa tem wa put kamjooh i thaw wow lehke ki khynnah neibhah heini katkam wa man katni da chong ki bru wow dih drugs dih kiad wei deiwa pynkylla ya ini i thaw kitæ waroh leh daw wiar ki.
Chooh chooh da ong u wa mynried daw ye u wanrah chiboon ki kaam ha ini i thaw.
Heiyatoh wa ki bru wow pynneh yei khooid i jngiar ha ini i thaw da ong u wa daw chna ya ka Committee yong ki khynroo na kani ka thaw wei ki won ye ki wow pynlang ya ka bai dukan wow pynemkaam yeiwa yoobiang ki ha ini i thaw.
Hawa kylli won ya ki dukan, u Wailad da ong u wa ym chna ya ki dukan tangwa daw e ya i thaw donhi wow chna ki yeiwa emkaam ki weiwa ym chna da ki yung kiwa skem pura namo ki Permanent Structure.
Discussion about this post