Neidaw wym em khutlang ya kiwa yahkhmat ka chnong Mynthong ha ka sngi wa lai pait lai sylli u MLA ka Jowai, u Wailadmiki Shylla deilang u Deputy Commissioner ka District, u Abhinav Kumar Singh ya ka DC Park kawa haap hapoh ka chnong Mynthong, Jowai, neiliang u waheh chnong u L. Pohktai sñiaw emkaam u wow pynche heiyatoh iwa da pyrchang ka chnong u pynbha pynmiat wei pynkhooid ya kani ka Park ha ki snem wa dadep, kamjooh leh i yaklam ya pynbait wa u DC warim.
U waheh chnong khana u wa hadien wa dep chna ya kani ka Park kawa em ha chrooh Quarter u Deputy Commissioner, WJH, da ieh khlem sumaar ya ka kamwa kattu katni snem.
Kamtæ ha u bnai January 2022 lyngba ka Locality Beautification Program wa da mang Rs. 1.30 lak cha ka chnong Mynthong na ka chnat Tourism Department ka sorkar jylla wei deiwa e bor u DC, u Garod L. S. N. Dykes, da pynlut kamwa Rs. 1 lak hei wow pynkhooid pynmiat pynbha ya kani ka Park.
Hadien ini da man kawa yooosuk yoopliah bha kamwa 3- 4 bnai, heiwa neiliang ka chnong Mynthong leh da booh bru ko yow wai u khang ya ka Park najrong wa pynlut leh na ka poisa ka chnong yow thwat pynkhooid, wei ha kitai ki por da man ko ka thaw wa sñiawsuk bha ki khynnah u wan kyndeh-ke man ka janmiet khamtam ha ka saitjaiñ wa ka sngi bibar.
Neitæ leh lyngba i kreh chitom ki VDP yong ka chnong ym em de wa nood u psiah kulmar chapoh ka Park nadooh kitai ki por hadooh katni, wot ya ki kari wa yieñ hapoh ka Seiñraij Parking Area leh manda dap 8.00 PM chaneiñ da phah mih ki Volunteer ki.
“Kamtæ wow ong wa man ko ka thaw dih drug dih kiad man iwa bakla”.
Ha u bnai April 2022 da lai kyrpaad ya u DC wow e bor u chah ya ka dorbar chnong u pait pynlai ya kani ka Park deiwa chim bai pynemkaam paiñkhana wei u booh ka dukan Coffee khnang yow yoh poisa u su ya kiwa pait wa kreh pura ha kani ka thaw, heiwa neiliang u DC da phah u dei thoh cha u waheh chnong yow pynkhreh ya ka Memorandum of Agreement (MoA), tangwa manda lai e ya kani ka MoA, ong won u DC wym ye de u leh neidaw wa daw pynman noh ya kani ka Park kam ka Open Gym wei neiliang ka chnong leh da pdiang ko ya ka Open Gym.
Kamtæ neidaw wym yohbor u pait da ka dorbar chnong, ka chnong da khang tala noh ko ya kani ka Park deiwa yooluti wa daw pynman Open Gym ya ka. Wei sñiawkmen u leh u yoo wa manda poi uni u DC wa katni da sdang pynkhooid biang ya ka, wei ym jooh em de wa yoh u psiah chapoh Park katwa pyneh ka chnong.
Ha u bnai Oct 2026 ka CEO ka Jowai Municipal Board da khut ko ya u waheh chnong ka Mynthong yow e thaw chna Open Gym, wei neiliang ka chnong da e yumut ko wow chna ha kani ka Park kamwa da tyrwa nadooh u snem 2022.
Katwa ka chnong dang yooluti ko u chna Open Gym, khyrngiat wan ko u yoo yei mih khubor wa ka sorkar em ko yei thmu iwa deiwi tawon khlem da khutlang wa kiwa yahkhmat chnong Mynthong. Wei ma toh hi wa e laad ka District Administration wow pynlai da ka chnong nadooh kitai ki por kani ka Park da pliah bha hi ko katni.
Heiyatoh wa iwon iwon i roi i paar, ka chnong Mynthong ym em pyrchah ko tangwa emkaam u pyntiplang lane deiwa embynta deilang kiwa yahkhmat chnong ha kiwon kiwon ki kaam kiwa ye u ktah yei bha, i chongsuk chongsaaiñ wa i khooid i jngiar ka chnong.
Wei lada ong u booh dukan næ pynman thaw tem thaw put ha kani ka Park leh emkaam bha u yoh i ya krehlang wa ka dorbar chnong yow lait ko u man ka thaw yadih yabaam, ya awri awra, yeiwa ka chnong Mynthong ym ye ko u chah næ pait donhi khlem pynkhor.
Ka dorbar chnong e ko leh i sñiawngooh wa khroo ya u MLA ka thaiñ u Wailadmiki Shylla uwa da theh u chiboon ki kaam pynroi hapoh ka chnong Mynthong wa kiwa dang pteiñ hadooh katni, wei neiliang ka chnong leh u nang ya krehlang ko wa u MLA neibynta i bha i miat yong ka chnong Mynthong wa ka Jowai Constituency hi waroh kawi.
Discussion about this post