Ka BJP Sikkim Mahila Morcha ynne da ujor ko ha ki pulit pyrchah ya u nong Meghalaya uwa da klam khlemakor ha Facebook pyrchah ya ka Sikkim wa ka nongbah yong ka jylla, ka Gangtok.
Ka President ka BJP Sikkim Mahila Morcha, ka Srijana Chettri da ujor FIR ko ha Sadar Police Station, Gangtok deiwa dawa pynchitom ya u Arhunki Laloo uwa na Meghalaya uwa man leh kam uwa emkti deilang wa ka Sikkim Riders Meet wa ka North East Riders Meet 2026.
Ha ka ujor da ong wa u Arhunki da booh u ya iwi i Facebook Post wa pynemkaam da ki kyntien khlemakor kam i “Land of Ladyboys”. “Bang-Cock”, “GangBang” wa “Suck-Him” yow klam pynsariem ya ka Sikkim wa ka Gangtok.
Ha ka FIR da ong wa kini ymtoh ki kyntien wa klam kyndeh donhi tangwa iwa khlemakor iwa yoobeiñ ya ka Gangtok kamjooh ki bru ka Sikkim wei hawa wan cha Sikkim ym em man ko kam ka rynsan wow klam beiñ.
Ka BJP Mahila Morcha da ong ko wa ka Sikkim da pdiang burom ko ya ki Tourist wa kiwa yah thuk-thuk tangwa em u pood ya ini waroh neibhah i bha mynsien ki tre chnong ym em mut wa tlot ki wei lada ym klam ki ym em mut wa pdiang ki manda em kiwa klam beiñ.
Da ong ko leh wa emkaam u burom ya ka Sikkim wa ki bru yong ka deiwa kyntu ya ki pulit wow leh yeiwa emkaam wei wow pynchitom ya uni u bru.
Da dawa wow pynngat hapoh ki kyndon wa biang ka BNS 2023 wa kynthup ya ka Section 296, 352 wa 356 wa kiwi de kiwa yatoh wa ini chirup wa ka aiñ Information Technology Act, 2000.
Khaddooh da ong wa ymtoh wow e laad wa ini wa jia toh iwa lait khlem chah pynchitom.





Discussion about this post