U Nehimaia Lamare, u MDC ka Liang Pyrchah ha ka Dorbar Tlang ka JHADC ha ka 20 tarik uni u bnai da wanrah u yaka phang yatai hajrong i tlot rukom pynkrehkaam ka Council lyngba ka juk stat Digital kam ka e-Governance deiwa pynemkaam da ki Computer wa Internet ha ki chnat krehkaam waphær waphær neibynta u e i chakri cha ki paidbah, wot hawa ka Council da pyrchang ko u pynbha pynmiat nadooh ki snem wa dep wei wot ha kani ka EC wa katni leh da chim ko ya ka laad ka luti.
Lyngba kani ka Motion da kylli u yei lai luti ka Council heiyatoh wa ka e-Governance hapoh ki chnat krehkaam wa kamjooh heiyatoh wa i yaleh ya ki kot ki sla wa emkaam ki paidbah.
Heiwa ong u im i haka juk wa da ku ha ki liang waroh heiyatoh i stat Technology, wei boon leh ki chnat krehkaam sorkar waphær waphær da pynkrehkaam Digital ki katwa ka Council won dang pteiñ krehkaam dei yongrim bait iwa da wanrah yei chem chitom ki paidbah heiyatoh ki kot ki sla wa kiwi de.
Pynkynmoo haroh u ya ka Motion wa wanrah u Jamshaphrang hajrong i wym biang i pynkrehkaam ya ka 15th Finance Commission, deiwa ong boi ye u man na ki daw wa tlot krehkaam ka e-Governance hapoh ka Council.
Neiliang u EM, u Meddling M Swer da pynche u ya ki bynta waphær waphær wa da pynkrehkaam Digital ha ki chnat krehkaam waphær ka Council.
Ong u wa ka EC da lai luti ko kyndon pa kyndon neibhah wow leh syndon ha waroh ki chnat ym pu ye katwa maad ka Council yei duna poisa.
Kamtæ kyntu u wow yaichah neibhah da pait wei leh chwa ha ki chnat wa rap duna i lut.
Ha kani ka Motion da chimbynta leh u yatai nadooh u Soki Lapasam wa u Awhai Andrew Shullai, wei u CEM, u Thombor Shiwat leh da pynraplang u wow pynche.





Discussion about this post