Jowai: Kiwa chong chnong ka Nongbareh Rim, kiwa haap hapoh ka Amlarem Block, West Jaiñtia Hills District da maad ki yei eh i khoo wa khroo neidaw wym yoh khoo rachon, chini wa i phniang charak.
Ha Nongbareh Rim da em kamwa 89 tylli ki manyung kiwa haap hapoh ka Priority Household PHH kawa jooh tip nachwa kam ka Below Poverty Line (BPL), 9 tylli ki manyung toh kiwa yoh khoo AAY wa 89 tylli ki manyung wa tipmit hapoh ka aiñ National Food Security Act (NFSA).
Nadooh u bnai Naikhynde hadooh u Kmaichonglad u snem 2016 wa ha Duyatra-Thohlakhmi (Jan-Feb) yong uni u snem thymme, kiwa chong chnong ym em de yoh phniang charak ki kamjooh ya i chini wa u khoo rachon.
Da pynbaad wa ha katai ka chnong ka dukan dai rachon (Fair Price Shop), da dai tam ko yei dor T.3 chi kilo ya u khoo PHH wa u kho AAY wa da booh da ka sorkar.
Hadien wa pynbna won ka sorkar wow pynthymme ya ki dukan dai rachon (Fair Price Shop), u Iong Pohlong, uwa pyllai ya kani ka dukan ym em li pynthymme u ya ka license yong oo.
Kawa yo phylla won toh wa ka Dorbar Chong Nongbareh Rim ym e laad ko ya kiwi tawan ki bru wa wow saam khoo rachon wei da suba wa kwah ko u pyllai hi da ka ya kani ka dukan dai rachon.
Neini i daw wa i saam rachon ha ka tai ka chnong da sangeh wei da em leh ki kattu katni ngut ki bru wa da ujor cha ka ka Sub-Divisional Officer (C), Amlarem Sub Division wa chah ktah ki paidbah khamtam kiwa dooh wa duk.
Hadien kani ka ujor, ka magistrate da hiar ko yow thooh tre yeini ha ka 16.02.17, tangwa hadooh katni leh ym pu mih iwon iwon i rai yow pynsuk ya ki paidbah.
Katkam ka aiñ National Food Security Act, ki dorbar chnong toh u kitkhlieh yow lai bait i saam rachon cha ki paidbah tangwa ha kani ka kynti da man ko dei khlieh cha tre heiwa ka chnong da pyndooh ko yei hok yong ki paidbah.
Discussion about this post