Shillong : I thai ka khubor wa daw mih sa kawi ka seiñ saiñpyrthai hapoh ka jylla da man ko kawa sakhiat heiwa ynne ka sngi da pynbna paidbah ya ka Peoples Democratic Front hapoh i yahkhmat u Ivanlumlang Marbaniang kam u President, u Emlang Lytan kam u Working President, u Auspicious Lyngdoh Mawphlang kam u General Secretary, u Sanborlang Khongwir wa u H. Samuel Marngar kam ki Vice President wa kiwi kiwi kiwa kitkaam.
Hei yaklam wa kiwa thohkhubor, ha ka yung krehkaam ka PDF ha Nongrim Hills, Shillong, u Ivan da ong u wa ya ka PDF da kha ha ka 1 Wisu uni u snem hei emlang ki 120 ngut ki dkhot kiwa na kylleiñ ka jylla wei da dep phah leh ya ki purtuid kiwa kitkaam kamjooh ki 116 ngut ki dkhot cha ka yung krehkaam ka Election Commission ka ri.
Neiliang u Secretary u Auspicious da ong u wa i daw wa seiñ ya ka PDF toh hadien wa da dooh mynsien ha waroh ki liang wei ka seiñ u kreh ko neibynta i eh i khoo kiwa mylla, kiwa rep, ki khynroo wei da kop u wa lada ka PDF wan ko hei bor daw pynman sakhiat ko ya waroh ini.
Hei yatoh won wa ka tih Uranium wa ka ILP kiwa yahkhmat ka seiñ ymbien ki u ong iwon iwon leh.
Neiliang u Working President u Emlang Lytan da saitkti u yei em yatoh ka PDF wa ka EC wa synchaar hapoh ka KHADC ka yong u Pynshngaiñ N. Syiem tangwa smat ki u pdiang ya kiwon kiwon kiwa kwah u pynyabi wa ka PDF.
Hei yatoh won wow pynyieñ kyrtong ha ka election MLA ha u snem 2018 ka PDF da ong ko wa daw bichaar bniah ko ya ki kyrtong chwa wow e tiket ya ki wei ki wym tieñ u kreh neibynta ka jaitbru.
Manda poi won wow e tiket cha kiwa chahbaad (criminal record) da ong ki wa ki kyrtong yong ki toh u man ki kiwa duna i lehkaam sih (lesser evil).
Discussion about this post