Khliehriat: Ynne ka sngi ka seiñ Jaiñtia Students Movement (JSM) da pynman ko ya ka yalang paidbah wow dawa na ka sorkar wow booh noh ko ya ka College Sorkar hapoh ka East Jaiñtia Hills.
Ya kani ka yalang da pynman ha madan ka Don Bosco H.S. School, Khliehriat wei da pyllai ya ka da u Publicity Secretary u Skhembha Dkhar.
U President ka seiñ JSM u Leningstar Rymbai da e u ya ki kyntien lamphrang hei klam yong oo da batai u yei daw wa dawa ka seiñ ya ka College Sorkar toh boon ki khynnah ki wym yoh thaw puræ hadien wa da dep Class X ki wei da khana u leh wa ka seiñ da e ko ya ka dorkhat cha ka sorkar wow dawa ya kani ka thaw puræ.
U President ka MPUF u D. Laloo hei klam yong oo da ong u wa emkaam u yatylli ki ki blai san snem ym ye ki u pybdooh yei emkaam ki paidbah.
Da kyntu u ya ki paidbah wow kyrchaan ya ki seiñbhalang khnang wow pynmankaam ya kiwa emkaam ka jaitbru.
Da yoh leh yei klam na u President ka KJNU u N.N. Shadap, da kylli u wa lada ym em kani ka College cheiwon u poi ka mynried ka mankawi yong ka jaitbru.
Kiwi kiwa da klam toh u President ka AJYWO – East Jaiñtia Hills u Wanchwa Suting, u Secretary ka EJNC, u Sambormi Lyngdoh, u President ka HANM u Chaniah, u President ka AJPM u R. Rymbai u President ka HYC – West Jaiñtia Hills u Damanleki Lathong, ka manbei ka Simi Khonthiang, wa kiwi kiwi.
Kiwa klam da e yaroh wei da e i kyrchaan ya ka JSM wa ini i dawa yong ka iwa man iwa emkaam bha hapoh ka East Jaiñtia.
Da ong ki leh wa i em kani ka thaw puræ ha East Jaiñtia u man ko i kyrkhu wa khroo ya ki paidbah khamtam ya kiwa dooh.
Ha kani ka yalang da rai ki paidbah wa ki heh seiñbhalang chisur wow dawa na ka sorkar wow booh ko ya kani ka thaw puræ.
U Secretary ka JSM u D Siangshai da e u ya ki kyntien e khublei ha kani ka yalang.
Discussion about this post