Jowai : Ka seiñ Khasi Jaiñtia National Union (KJNU), hapoh i yahkhmat u president ka seiñ u N.N. Shadap chirup wa ki dkhot ka seiñ ynne ka sngi da lai sylli ki ya ka rukom thawkhia ka Weigh Bridge wa em ha chnong Sohkha, kawa tip kam ka Amsarin Weigh Bridge, hapoh ka Amlarem Civil Sub-Division, West Jaiñtia Hills District.
“Ynne kani ka sngi ka seiñ da yoo ko da ki khmat yei rukom thaw khia kani ka thaw yeiwa leh pyrchah ko ya ki kyndon aiñ neibhah wa ki bor wa pait yeini kiwa hajrong da dep mana ki wow kit du khynde ton tangwa kani ka Weigh Bridge da elaad ko ya ki truck wow kit palat (Overload) nadooh u mooyong wa u moochuni wow challan cha ri Bangladesh du neidaw wow yoh myntoi kani ka Weight Bridge” da ong u Shadap.
Neiliang ka seiñ da dap ki dei mynsien wa chrai pyrchah ya kani ka thaw kawa pyllait ya ki truck wa kit palat pood (Over Load) khlem thaw khia deiwa biang.
Kamtæ ka seiñ da ujor ko pyrchah yeini ha ka Jowai Police Station.
Ka seiñ da kam ko leh wa hawa kwah ko u yachem ya ki sahep sorkar heipor wa lai sylli ko ya kani ka Weigh Bridge boonsien ym yachem ko wa ki heiwa ka seiñ da sñiaw phylla ko wa neiyi i daw wa em du kiwa kreh kiwa ym tipmit khlem em ki sahep wow pyllai yei rukom krehkaam kani ka thaw.
Ka seiñ da kam ko wa ini waroh man i iwa dooh myntoi ya ka sorkar heiwa da kyntu ko ya ka sorkar wow chimkhia yeini wow yoh myntoi ko.
Discussion about this post