Shillong: Ki wa kreh kiwa jooh yarap ha ki kaam e dawai ya ki khynnah wa ki manbei wa punkhon, kiwa tip kam ki Accredited Social Health Activist (ASHA) ynne ka sngi da lai paidbah ki wow dawa na ka sorkar wow e tulop noh kawa pura neibynta ki kaam wa kreh ki.
Da sdang ya kani ka lai paidbah na Quinton Road wei da pynkut won ha i thaw pynyieñ kari ka Additional Secretariat, Shillong.
Ha kani ka lai paidbah da ki spah ngut ki wakreh ASHA na kylleiñ ka jylla da wan ki wow yachimbynta ryngkat i rah ya ki placard wei i kbai i kyrha wow dawa wow pynkrehkaam noh yeiwa da dawa ki. Hadien ini da em ka yalang ha kani ka thaw heiwa neiliang kiwa yahkhmat ka Meghalaya ASHA Workers & Felicitator Union wa ka Meghalaya ASHA Workers Union da lai yachem ki wa u Chief Secretary ka jylla, u K. S. Kropha wow e dorkhat yeiwa da dawa ki.
Hawa yaklam wa kiwa thoh khubor ka president yong ka MAWFU wa ka MAWU, ka Haphilin Pyrtuh da khana ko wa ryngkat wa kiwa kreh ASHA ha ka ri waroh kawi, ki ASHA da pynman ki ya i lai paidbah wow booh yeiwa da dawa hakhmat u Montri Rangbahdooh ka Ri (PMO).
Da ong ko wa ki ASHA ha ka jylla kiwa em palat 6000 ngut ym ye de ki wow kreh mon sñiawbha neibhah wa katwa dang mih ki sngi i kreh yong ki man i iwa khia katwa ka tulop won yoh ki du T. 1,000 chi bnai wei haap ki u pynkhreh ya ki bui (report) man la u bnai.
Ha kiwi ki jylla ki ASHA da su da ki sorkar jylla ha i dor wa T. 4,000 hadooh T. 6,000 chi bnai wei ha kani ka jylla da dawa ki wow yoh T. 3,000 chibnai hajrong ka bai lai bai wan khnang wow rap ye ki u leh yei kaam yong ki.
Da pyntip ko wa neiliang u Chief Secretary ympu em u e u iwon iwon i kular hei yatoh wa ini.
Discussion about this post