Jowai : Ha ka yalehke Quarter Final wa ar yong ka Tiger Five da pynman ha pyrdi ka Real United pyrchah ya ka Dari & Da oo. Kani ka yalehke da pynhun bha ko ya ki paidbah heiwa ka yalehke na waroh arliang ki dhab da pynyoo ki yei sap lehke yong ki.
Ha ka kylla step ka yalehke ka Real United da yoh ko wow pynkhih ya ka jaar kool ha ka minit wa 13 heiwa u Riolanroy Suchiang da yoh u wow thap ya ka kool.
Heijooh i por ha ka minit wa 16 da yoh biang ko wow thap ya ka kool wa ar lyngba u jooh u wa yalehke.
Ya ka kol wa le da yoh u thap da u Nitejan Pala ha ka minit wa 28, katwa neiliang ka Dari & Da oo da yoh ko wow su ya ki kool ha ka minit wa 20, kamjooh ya ka kool wa ar won da yoh ki u thap ha ka 28 minit yong ka kylla step.
Lyngba kini ki kool ha ka yakehke, ki paidbah da neh ki wow yang yi wow jia ha ka kylla miet yong ka yalehke. Hawa sdang ka yalehke da man ko kawa yathaiñ bha hadooh wow poi ka minit wa 39 heiwa ka Dari & Da oo da yoh ko ya ka kool wa le lyngba i bakla u wa yalehke ka Real United da toh thap u ya kani ka kool pyn cha ki (own goal), ha ka minit wa 51 ka Real United da pyntam biang ko ya ka kool wa soo lyngba u Nitejan Pala, kamjooh ya ka kool wa san da thap ha ka minit wa 53 da u Riolanroy Suchiang.
Neiliang ka Dari & Da oo da Sai lut ki yei bor wei buit yalehke yong ki hadooh wow yoh ki ya ka kool wa soo ha ka minit wa 56 lyngba u Civil katwa ya ka kool wa san kawa man leh ka kool wow pynyadraw da yohlad u thap da ka indirect kick, ya kani da yoh hadien i bakla u wa yangkool ya ki kyndon ka yalehke katkam i por da kut ko 5-5 kool.
Kamtæ yow rai jop da chut noh da ka Tiebreaker heiwa ka Dari & Da oo da yoh ko u thap 3 tylli ki kool, katwa neiliang ka Real United da ye ko u thap du kawi donhi ka kool wei da rai jop noh ya ka Da oo & Dari wei da psiah noh ko cha ka Semi Final.
Myntu ka 12 tarik ka yalehke yaknieh psiah Semi Final u man ko ha pyrdi ka Tyllilang pyrchah ya ka Para I heipor 3:30pm.
Discussion about this post