U chna ya ka yungskur ka Seiñraij hei lut kamwa T. 1.88 Klur lyngba ka sorkar jylla

Jowai: Ynne ka sngi man ko ka sngi wow sah kynmoo ya ka skur Seiñraij Higher Secondary School Jowai heiwa da booh u ya u Mooyurim yong kani ka skur ha Umsangkheiñ, Dulong, Jowai ha ka yalang heiwa u Symbood Montri Rangbah ka jylla u Dr. R.C. Laloo da man u kam u kongsan.

Kani ka skur toh kawa da sdang nadooh u snem 1964 ha Yungwalieh ka Loompyrdi Iongpiah, da ka Upper Primary, wei da sdang won ya ka Lower Primary ha u snem 1970, katwa ha u snem 1984 won da sdang sa ya ka Secondary Section.

Ka skur da lai luti ko hadooh wa da tipmit ya ka kam ka Deficit, ha u snem 1994 wei da sdang ko sa ya ka Higher Secondary ha u snem 2009 deiwa sdang ya ka class XI Arts.

Chwa wow sdang ka yalang da yoh ya ki kyntien pdiang burom na u Chairman ka Education Committee ka Seiñrai u O.C. Lakiang ki kyntien ngoohblai na u Dolloi ka Elaka Jowai u Puramon Kynjing, wa i sur pdiang burom na ki khynnah kani ka skur.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Ya kani ka yung skur u chna lyngba ka scheme yong ka jylla kawa tip kam ka Supporting Human Capital Development kawa yarap poisa da ka Asian Development Bank.

U Director ka Higher Education & Literacy ka jylla u Ambrose CH Marak hei klam kam u symbood kongsan da e khublei u ya ka skur wa da yoh ko ya kani ka yarap lyngba ka sorkar.

Da ong u wa i jied ya kani ka skur toh iwa eh bha neibhah wa hapoh ka jylla da booh 117 tylli ki skur wow yoh ya kani ka scheme heiwa daw pait yei psiah ki khynnah (Enrollment), i heh i thaw wa ye u chna ya kani ka skur wa kiwi kiwi.

U Dr. R.C. Laloo kam u kongsan hei klam da ong u wa boi ki khynnah lym yoh ki i thaw chong wa biang boi ym wan ki cha skur kamtæ da thooh ki laad wow yarap wow kyntu ya i stat i tip deiwa wanrah ya kani ka scheme.

Da pyntip u wa ya kani ka skur ha ka kyrdan Secondary u chna hei lut kamwa T. 1.88 klur ka wow em ki soo tylli kamra (classroom), ki laboratory, ka library wa kiwi kiwi.

Da ong u o leh wa heipor wa man u kam u Montri i stat i tip da phah u ya ka dorkhat cha ka Finance Department heiwa da paan u 6 ngut kiwa sikai ha kani ka skur ki wow yoh ka tulop wa T. 22,000 samen.

Ha kani ka yalang da yoh ya i klam na u K. Kyndiah uwa man leh u dkhot ka Education Committee, u O.H. Toi, ka Principal ka skur ka D. Bareh, wa kiwi kiwi.

Da pynphooh ya kani ka sngi da ki chaad na ki khynnah puræ kani ka skur wa na ka tnat Art & Culture ka Seiñraij Jowai.

Da pynkut ya ka yalang da ki kyntien khublei na u Secretary ka Education Committee u G.H. Bareh.